‘Nâu jĭ hơyak gĭt kăl vă chih hơdăh trong jang kăt tơjur, hơmet mingkhul bơngai jang đơ̆ng Trung ương. Tơdrong iŏk nơ̆r tơgop đei pơgơ̆r tôch hơiă, đơ̆ng hôp tơpôl truh ƀơk kơ phĭu ăn rim unh hnam, pơm ‘lơ̆ng, rơđăh rđong. Tơ̆ plei Ia Nueng, xăh Biển Hồ (plt Pleiku), kon pơlei vang tơgop lơ nơ̆r tôch tơpăt.

Kon pơlei tơƀôh đon lui hăm tơdrong pơih xă xăh Biển Hồ, atŭm hăm ‘nŏh athei hơtŏk khul kăn ƀô̆ bơngai kon kông bơ̆ jang găh luơ̆t vă tơgŭm ăn kon pơlei đơ̆ng rŏng kơ tơmât hơdai. Khei ‘năr âu ki, khul kơdră pơgơ̆r tơring kơchăng chă roi tơbăt tôch rơđăh tơdrong vă hơmet ming anih jang âu. Adrol kơ ‘nŏh, Khul kơdră chĕp kơ̆l Đảng ƀô̆ dêh char drơ̆ng nơ̆r kiơ̆ trong tơjur đơ̆ng 218 anih jang jur pă 77 anih jang tơ̆ xăh. Đơ̆ng rŏng kơ iŏk nơ̆r tơgop, Anih vei lăng kon pơlei xăh vă chih akŏm, gơih ăn anih jang kơpal hơlen, tơchơ̆t ăn.