Truh ƀât ‘măng jang plei Canh Tiến, xăh Canh Vinh, dêh char Gia Lai, ƀơ̆r hơri đơ̆ng đe kon mon hơioh tơ̆ Hnam hŏk mâm non păr ang jơ̆p bri kông. Tơ̆ lăm hŏk đei 32 'nu hŏk tro, đe oh oei pơtâp hơxoang 'moi kiơ̆ nhak đơ̆ng tivi 'nao đei răt hơmet. Ƀai nhak, ƀơ̆r hiĕk đơ̆ng đe hơioh mât hơdai hăm băl, pơjing đei 1 anih tôch chơt hơiă. Oh Đinh Thị An, 8 sơnăm, chơt hơiă tơroi: “Adrol ki năm hŏk ưh đei điên, tơjê̆ âu năm hŏk đei điên, đei kuat păng tivi hai, inh ƀôh đe kô pơtho tôch ƀônh hlôh, đei kuat mưh ‘năr tŏ ‘nŏh tôch rơngơp.”

Đei 2 sơnăm pơtho tơ̆ Hnam hŏk lơ̆m tơring hơtăih yăih Canh Tiến, kô Nguyễn Thị Mỹ Trinh, 28 sơnăm, dang ei ưh ê păng tôch hơiă hăm tơdrong tơplih tơ̆ âu. Yoa đunh kơ âu ưh đei dang yơ, tơring âu oei ưh kơmăh, kơƀăh kơ ƀôch tôm tơdrong, ‘nhŏ chă lăng ngôi ka nhak lơ̆m tivi jĭ kơ đei ‘mơ̆i. Kơdih kâu kô Trinh, hơnơ̆ng lơ̆m 2 sơnăm, rim năr truh tơ̆ lăm năm pơtho ‘nŏh jĭ tơdrong nol tih. Jăl trong yak 20km đơ̆ng hnam truh tơ̆ lăm trong kông kŏ, tĕh pŭk, trôk rơbơ̆r, mưh ‘mi athei yak thŏng nan, yak trong ver, hiong lơ jơ. Mă lei dang ei, rim năr năm pơtho, hăm kô jĭ tơdrong hơiă yoa trong yak tôch ‘lơ̆ng: “Đơ̆ng đei trong ‘nao, đe thây kô năm pơtho hiôk ƀiơ̆, tơmam drăm păng lăm hŏk kŭm đei răt hơmet, sơng pơ ‘lơ̆ng, đei điên sư tơgŭm ăn thây kô păng hŏk tro chă lăng ngôi tivi, đei pơtâp hơri păng lăng ngôi lơ tơdrong tôch đei yoa, tơgŭm ăn đe thây kô pơtho roi ‘lơ̆ng ƀiơ̆.”

Ưh lăp hơdrô̆ thây kô đơ̆ng tơring nai truh đĕch, lơ bơngai arih xa truh 'lŏ tơ̆ tơring pơmat Canh Tiến kŭm rơih trong vih dơ̆ng vă bơ̆ jang vang tơgop pơm tơplih ăn pơlei pơla. Kô Đinh Thị Trang, 22 sơnăm, 'nao hŏk đang cao đẳng sư phạm hlôi nôp hla ar apinh pơtho tơ̆ pơlei. Dang ei, đơ̆ng rŏng 2 khei pơtho, jĭ kô vei lăng lăm 2C, hnam hŏk jăl mônh Canh Tiến, kô Trang ƀôh hơdăh  tơdrong tơplih 'lơ̆ng, yoa dôm tơmam vă pơtho pơhrăm đei răt hơmet tôm ƀiơ̆ pơting hăm dôm sơnăm adrol sơ̆: 

Kô Đinh Thị Trang pơma: “Pơting hăm dôm sơnăm adrol sơ̆, sơnăm ‘nâu đei Anih vei lăng kon pơlei xăh pơngơ̆t lơ ƀiơ̆, răt ăn hnam hŏk tôm tơmam vă pơtho ăn hŏk tro, hŏk tro hŏk kŭm roi rơgei ƀiơ̆ păng đei hŏk hăm dôm tơmam ‘nao ‘lơ̆ng, đe oh ưh pă ƀôh hlĭch nhen blŭng a bơih. Jĭ kô pơtho athei pơtho ăn hŏk tro mă hơlen rim tơdrong, pơtho dar deh, ‘măn jơ pơtho lơ ƀiơ̆ ăn đe oh vă đơ̆ng noh đe oh gơ̆h hŏk ƀai roi hlôh vao”.

Hŏk tro chơt, thây kô roi hơiă hăm dôm tơdrong tơplih tơ̆ pơlei Canh Tiến, xăh Canh Vinh, dêh char Gia Lai. Mă lei hơiă hlŏh jĭ đe mĕ ƀă hŏk tro, yoa tơmam pơm ngôi, hŏk pơhrăm đơ̆ng đe oh đei roi tôm, đe sư gơ̆h hơđơ̆ng jơhngâm năm choh jang xa. Mŏ Đinh Thị Yến, đei kon hŏk tơ̆ Hnam trưng jăl mônh Canh Tiến, pơma: “Pơting hăm adrol sơ̆ dang ei tơmam kŭm đei tôm ƀiơ̆, ‘măng jang, dur var đei hơmet ming, đei dơ̆ng tivi, thây kô pơih ăn hŏk tro lăng, hŏk ƀônh hlôh ƀiơ̆. Ƀôh kon hŏk pơting hăm adrol ki nhen roi gơ̆h ƀiơ̆, tơ̆ hnam mon gơ̆h hơri, hơxoang, đŏk thơ, kon hŏk roi gơ̆h ƀiơ̆ tơpă”. 

Kiơ̆ ƀok Dương Hiệp Hòa, Kơdră vei lăng kon pơlei xăh Canh Vinh, tơring tơlĕch 300 triu hlak jên ăn 2 hnam hŏk mâm non păng jăl mônh, hăm 5 lăm hŏk, tơgŭm hơmet pơ ‘lơ̆ng tơdrong pơtho păng hŏk pơhrăm: “Hăm jơhngâm đon pơvih ăn kon pơlei, đe thây kô kŭm adrin pơtho tơ̆ âu, pơtho trŏ hăm tơdrong hơgăt. Hŏk tro tơ̆ Canh Tiến tôch čhôk 'nă, mă loi sơnăm hŏk âu ki đe oh 'măng mă blŭng ƀôh lêh pơih blŭng sơnăm hŏk 'nao chơt hơiă, adrol sơ̆ đe sư ƀôh ưh chơt, thây kô nhen ưh gan hưch hanh yoa đe sư ƀôh hŏk tro oei kơmăh, kơ ƀăh kơ ƀôch lơ tơdrong. Truh âu kơnh xă vă tơlĕch jên jang lơ ƀiơ̆, răt hơmet tôm tơmam hŏk pơhrăm ăn hŏk tro, pơm lăp hăm tơdrong 'mĕh vă pơtho păng hŏk pơhrăm.”

Ƀât tŏk bŏk bri kông tôch xă, dôm lăm hŏk ƀrach hơdăh unh điên tơ̆ Canh Tiến hrei ‘nâu ưh lăp jing tơdrong hơiă kơ đe hơioh đĕch, mă oei jing tơdrong iŏk đei đơ̆ng dôm tơdrong adrin ưh đei pơdơ̆h, đơ̆ng đe thây kô, đơ̆ng khul kơdră tơring păng tơpôl. Canh Tiến kŭm nhen lơ tơring pơmat tat nai kơ Gia Lai tŏk bŏk đei teh đak tơlĕch jên jang hrơ̆ch ‘lơ̆ng, hơmet tôm tơmam vă vang mât hơdai lơ̆m tơdrong jang tŏk kŭm hăm teh đak lơ̆m chăl ‘nao.