Tổng Bí thư Tô Lâm păng Thủ tướng Phạm Minh Chính vang truh pơm lêh tơ̆ Hnam trưng hŏk teh đak rong jăl 1 păng jăl 2 Đồng Đăng, xăh Đồng Đăng, dêh char Lạng Sơn. Lêh tơlĕch jang đei pơgơ̆r tơ̆ 17 hơnih pơih pơdăh ti vi kơtă păng 104 hơnih pơih trực tuyến lơ̆m teh đak. Pơma tơ̆ jơ pơm lêh, Tổng Bí thư Tô Lâm pơma hơdăh, lơ̆m rim jăl jang kơ Kach mang, Đảng, Teh đak ling lang ‘măn tơdrong bơngơ̆t truh, tơmơ̆t jên jang ăn hơtŏk tơiung pơtho pơhrăm tơ̆ tơring sơlam. Anih tơm Chĭnh trĭ hlôi tơchơ̆t tơmơ̆t jên jang man 248 tŏ hnam trưng teh đak đak rong 2 jăl tơ̆ 248 xăh sơlam tơ̆ kông. ‘Nâu jĭ 1 trong jang trŏ ƀlep, đei tơdrong ‘lơ̆ng ‘mêm mơnat gĭt kăl, tơƀôh tơdrong bơngơ̆t truh gĭt kăl đơ̆ng Đảng, Teh đak hăm kon pơlei tơring sơlam, tơring hơtăih hơtŏ, oei lơ mơmat tat.

Tổng Bí thư Tô Lâm athei kơdră đảng, kơdră chĕp kơ̆l rim tơring khŏm mơ̆t jang, hơnơ̆ng hơlen lăng, dăr lăng păng athei jăh bơ̆jang vă tơdrong jang đei tơlĕch jang man hrĕnh hloh, ‘lơ̆ng hloh, đei yua hloh, tơtom pơyua ăn sơnăm hŏk ‘nao 2027 - 2028. Hơdai hăm ‘noh, anih vei lăng pơtho pơhrăm athei man hnam trưng hŏk tơklep hơdai hăm pơjing hơnih pơtho pơhrăm ‘nao, tôm tơdrong. Hơdai hăm tơdrong pơtho chư, kăl kơ lăng truh pơtho bơngai, pơhrăm ming đon tơchĕng păng đon hlôh vao ki luơ̆t ăn hŏk tro, hơpơi ‘meh yak tŏk păng chhô̆k ‘nă găh tơdrong joăt joe kơ pơlei pơla.