Xăh Ea Bung đei pơjing kiơ̆ lơ̆m tơmơ̆t hơdai 2 xăh so, đei teh să hloh 390 km², kơsô̆ kon pơlei hloh 9.700 ‘nu. Xăh hlôi bơ̆jang hiôk ‘lơ̆ng lơ̆m tơdrong jang khŭl kơdră chĕp kơ̆l tơring 2 tăl; kơsô̆ hô sơ đei hơmet pơ ‘lơ̆ng trŏ khei ‘năr pơkăp păng hơdrol khei ‘năr pơkăp đei hloh 99%. Mă lei, tơring tŏk bŏk ưh kơ măh ƀiên chê̆, trong nơnăm, dơnâu mong đak kơnê̆ ngăl bơih, pơm mơmat tat ăn jang sa păng tơdrong hơrih sa, kơsô̆ ŭnh hnam dơnuh hin păng vă jê̆ dơnuh hin oei truh 35,4%.

Tơ̆ jơ bơ̆jang, Phŏ Thủ tướng Hồ Quốc Dũng pơma hơdăh, Ea Bung jĭ tơring sơlam, tơdrong hơrih oei mơmat tat lơ, yua thoi noh kăl kơ tơgŭm hơdrol jên jang ăn anih jang kăl, mă loi ‘noh jĭ trong nơnăm păng dơnâu mong đak. Phŏ Thủ tướng athei tơring hơnơ̆ng dăr hơlen, proh hơmet khŭl jang tŏ sĕt bơngai, hơtŏk ‘lơ̆ng đei yua tơdrong jang khŭl kơdră chĕp kơ̆l tơring; tŭn pran tơplih kơsô̆, hơmet ming bơ̆jang, pơm tơdrong hiôk ăn kon pơlei; pơm rơđăh dôm tơdrong tơm pơm ăn dơnuh hin vă đei trong jang tơgŭm kon pơlei.