Thủ tướng pơma hơdăh, tơdrong tang găn rôp yâu ka glăi hăm IUU (tơdrong rôp yâk ka hơdang glăi luơ̆t, ưh đei chih tơroi păng ưh đei pơm kiơ̆ tơdrong hơgăt) ưh lăp vă pơm lăp hăm tơdrong ‘mĕh vă tĕch mơdro tơ̆ teh đak đe đĕch mă kăl hlŏh jĭ yoa trong jang đunh đai: pơm ‘lơ̆ng ăn tơdrong jang xa, arih xa kơ kon pơlei păng tơƀôh hơdăh bưng ai teh đak.

Vă bơ̆ jang đei tơdrong ‘nâu, Thủ tướng Phạm Minh Chính ăn tơbăt, Khul kơdră teh đak Việt Nam tơlĕch jang tôch pran lơ trong jang nhen hơmet pơ ‘lơ̆ng trong pơgơ̆r jang; hơnơ̆ng chă răp mơ̆ng nơ̆r tơtă đơ̆ng Anih vei lăng Châu Âu (EC) vă hơmet pơ ‘lơ̆ng dôm tơdrong oei tơhlăk găh luơ̆t. Pơgơ̆r vei lăng, dăr lăng, hơtŏk tơdrong jang hăm kơmăy sô̆, chih tơroi hơdăh rim tơdrong đơ̆ng kon pơlei jang ka hăm anih vei lăng ƀato păng tơmât yoa kơmăy dăr lăng trong yak (VMS). Găh noh dơ̆ng, pơm kiơ̆ luơ̆t, sek tơlang tơpăt, tơkêng dôm tơdrong pơm glăi tơ̆ tơring đak dơsĭ teh đak đe păng rôp yâu ka hơdang glăi luơ̆t.