Thôn 5B, xah Hoà Ninh, dêh char Lâm Đồng, tơring mă yă ƀok, mĕ ƀă kơ pơmai Ka Thuân hơrih jang xa đơ̆ng đunh sơ̆ jing tơring oei răk vei tơdrong jang tanh brai. Đơ̆ng oei 'lơ̆p, Ka Thuân hlôi juăt hăm um rup hơbăn văr, khăn juăt jue kơ đe drăkăn K’ho, dôm kơpen, khăn văr ƀônh ƀŏ mă lei akŏm ƀenh kơ tơdrong joh ayŏ kơdih.

Sơnăm 2019, ah mă pơdơh tơdăng tơdrong jang tơ̆ kŏng ti vă rong kon hơ-ioh iĕ, Ka Thuân pơtơm tĕch tơmam kiơ̆ online păng ƀôh đei lơ tơmoi răt tơrĕk truh gah che tanh juăt jue. Lơ̆m hnam đei kơmăi chơchoh sĭt hơbăn ao, đei ƀă păng pơmai pơtho sĭt mei đơ̆ng oei 'lơ̆p, pơmai pơkăp kơdih pơm tơlĕch tơmam drăm kơ po, iŏk hơnăn Ka Thuân Minz. Ƀơ̆t blŭng, pơmai chă sĭt hơbăn ao tanh ăn kơdih po hrŭk năm chă et xa pơkong ou to. Ƀôh 'lơ̆ng, lơ bơngai bơnê, păng chih măt răt yua. Pơmai Ka Thuân chơt hơ-iă tơroi: “Hơdrol kơ inh pơih hơnih sĭt mei hơbăn ao 'nao che tanh juăt jue kơ kon kông K’Ho, tơ̆ tơring inh ƀôh lơ kon pơlei lăp hrŭk hơbăn ao tanh kiơ̆ pơrŏ hăm hơbăn ao hrei ou. Đơ̆ng noh inh tơchĕng tơguăt đơ̆ng che tanh hăm hơbăn ao hrŭk dang ei hăm tơdrong hơpơi 'meh vei răk tơƀăk mong um ai joh ayŏ juăt jue so đơ̆ng yă ƀok răk ăn, ah mă đe sơnăm mơlôh hrŭk hơbăn ao tanh ou noh đe kon sou băt gah joh ayŏ juăt jue mă yă ƀok pơsư̆ ăn, đơ̆ng noh đe sư băt chă vei răk. Bơngai răt lăp mă yơ noh inh gô sĭt mei kiơ̆ mă noh. Ah mă tơmoi athei sĭt mei thoi yơ noh inh gô pơkă kăt chơchoh thoi ăi. Bơngai răt hơtaih hloh noh viêt kiu păng bơngai teh đak đe. Hơnih sĭt mei hơbăn ao inh hơdrô̆ tĕch ăn dôm bơngai lăp kơ hơbăn ao tanh noh inh pơtơm sĭt mei ăn kơ đe”.

Đơ̆ng rŏng kơ tơdrong jang đei jơnei kơ Ka Thuân noh đei tơdrong yak hơdoi đơ̆ng unh hnam. 'Nhŏng K’Hùng, klo pơmai chơt hơ-iă iŏk jang tôm tơdrong jang kơ unh hnam vă hơkăn đei jơ rơvơn akŏm ăn tơdrong lăp sĭt mei hơbăn ao tanh. Ưh hơdrô̆ thoi noh, rim 'măng pơmai Ka Thuân 'nhăk tơmam tanh sĭt năm akŏm pơdah, tơbang gah hơbăn ao tanh lơ̆m păng 'nguaih kơ dêh char, 'nhŏng Ka Hùng hơdoi hăm hơkăn vang jang tơdrong trăp, vei lăng kon hơ-ioh vă hơkăn akŏm pơm jang: “Inh tơgŭm ăn tơdrong jang hơkăn inh. 'Nou jĭ tơdrong jang juăt jue kon kông po kơdih, vă kôn mon kon sou hơnơ̆ng băt truh. Inh tơgŭm ăn hơkăn sơđơ̆ng pơm jang, hơtŏk tơdrong jang ou vă tơbang che tanh bơngai K’Ho đei pơlan să ưh hơdrô̆ lơ̆m teh đak păng teh đak đe adoi băt truh”

Kiơ̆ đơ̆ng tơdrong vang năm akŏm pơdah hơbăn ao sĭt đơ̆ng che tanh lơ̆m mạng tơpôl, hơbăn ao che tanh kơ Ka Thuân roi năr roi đei lơ bơngai băt truh. Dôm hơbăn ao đơ̆ng che tanh kơ pơmai Ka Thuân pơjing đei ưh hơdrô̆ pơm ăn bơngai hrŭk ƀôh guăng 'lơ̆ng mă oei tơ-iung tơdrong pơ-ư pơ-ang. Sơnăm 2024, tơdrong pơtơm iung jang “Pơtruh che tanh hăm rim bơngai” đơ̆ng Ka Thuân đei iŏk hơpah mă Ƀar kơ tơdrong pơlong iung pơm jang tơplih gơh hơgei dêh char Lâm Đồng 'măng mă 7. 'Nou ưh hơdrô̆ tơmam hơpah ăn tơdrong gơh hơgei, mă oei jing tơdrong pôk hơpah ăn tơdrong hdrin vei răk tơƀăk mong joh ayŏ kon kông lơ̆m chăl hơrih jang xa 'nao.

'Nhŏng K’Vũ tơ̆ xah Đinh Văn Lâm Hà akhan, hăm tơpang ti gơh hơgei kơ pơmai Ka Thuân, dôm hơbăn ao sĭt đei đơ̆ng che tanh vei răk đei đon bơnôh, um ai joh ayŏ Tây Nguyên, đei hloi tơdrong hơtŏk trŏ ƀlep hăm tơdrong hơrih hrei ou: “Che tanh đei lơ bơngai lăng truh kơlih dang ei dôm tơmam drăm thoi ou noh tŏ sĕt sot. Dôm tơdrong akŏm pơdah, mă kăl noh ah mă inh hrŭk hơbăn ao ou hăp kăp gĭt tơpă, hơnơ̆ng pơm ăn kơ inh  pơ-ư pơ-ang kăp gĭt tơpă. Pơmai sĭt tôch hơgei, vă vei răk tơƀăk mong thoi ou noh adoi hrat tơpă, răk đei 'noh tơgăl kơ pôk bơnê”.

Hơlen lăng păng lăp kơ hơbăn ao sĭt đơ̆ng che tanh kơyuơ pơmai Ka Thuân pơm tơlĕch, pơmai Hoàng Thị Thanh Huyền, bơngai pơtho tơ̆ Hnam trưng Phôh thŏng teh đak rong 'me dêh char Lâm Đồng tơroi: “Inh ƀôh tôm tơmam ou tơbang hơdah tơdrong joh ayŏ kơ kon pơlei tơ̆ tơring Tây Nguyên, tơdrong juăt jue mă lei adoi đei tơdrong 'nao. Lơ hơbăn ao đei sĭt kiơ̆ trong 'nao iŏk đơ̆ng tơm juăt jue, 'nao păng gơh hơgei. Kơdih inh noh bơngai pơtho tơ̆ hnam trưng Kon kông Teh đak rong 'me dêh char Lâm Đồng 'noh inh ƀôh pơ-ư pơ-ang kơdih gah pơlei pơla mă 2 ou păng mơn tơdrong guăng 'lơ̆ng ou athei đei vei răk tơƀăk mong lơ hloh dơ̆ng”.

Hăt hot hăm tơdrong jang chơchoh sĭt hơbăn kơ pơlei pơla, rim sơnăm, hăm săng nep păng tơpang ti gơh hơgei kơ pơmai Ka Thuân, kơ hrĕng hơbăn ao sĭt đơ̆ng che tanh đei pơm tơlĕch, đei ƀôh lơ̆m tơdrong akŏm et xa, pơkong păng dôm tơdrong kăp gĭt nai. Mă kăl, um rup hơdruh mai kon kông K’ho hrŭk hơbăn ao pơlong sĭt đơ̆ng che tanh hăm dok juăt jue jing tơdrong pơ-ư pơ-ang tih hloh hăm pơmai Ka Thuân.

Lơ̆m tơdrong hơrih tơplih 'nao rim năr kơ Tây Nguyên, pơmai Ka Thuân Minz adoi oei hăt hot hăm kơmăi chơchoh hơbăn ao, akŏm tôm joh ayŏ K’ho lơ̆m rim hơbăn ao sĭt đei. Đơ̆ng hlak che tanh kơ bri kông, Ka Thuân Minz tŏk bŏk oei pơjing hơbăn hrŭk 'nao – hơpơi 'meh tơdrong joh ayŏ đei vei răk tơƀăk mong păng tơgĭt pơlan să hơdah hloh lơ̆m tơdrong hơrih hrei ou.