Kuô̆k hô̆i jĭ hơnih mă dôm tơdrong đei lơ̆m tơdrong hơrih pơtruh, pơma đam păng đei tơplih jing tơchơ̆t tơgŭm, khôi luơ̆t. Mă lei tơdrong ưh đei pơdơh  lơ̆m hop akŏm. Tơdrong mă kon pơlei tah hla tơrĕk truh noh jing dôm tơchơ̆t noh dah tenh kuăng đei tơmơ̆t lơ̆m tơdrong hơrih, pơklaih tơnap tap păng pơm trong tơplih 'lơ̆ng dah mă ưh.

Tơdrong mă ou đei tơƀôh hơdah lơ̆m 'Măng hop akŏm ưh kiơ̆ pơkăp mă Mônh, Kuô̆k hô̆i jăl 16 pơtôch đơ̆ng rŏng 17 năr pơm jang. Kuô̆k hô̆i hơlen lăng 15 luơ̆t, 6 tơchơ̆t khôi luơ̆t, tơgop nơ̆r 'măng mă blŭng hăm 7 luơ̆t păng tơchơ̆t 7 tơdrong kăp gĭt, vă sek tơlang dôm tơdrong đei ƀôh, pơklaih hơnih tơhlăk, pơm trong hiôk hloh ăn kon pơlei, hơnih jang mŭk drăm.

Tơrĕk hloh noh, lơ̆m 'măng hop akŏm hlôi đei 2.680 nơ̆r tơgop pơma đam tơ̆ khul păng 535 nơ̆r tơgop tơ̆ hnam akŏm. Dôm kơsô̆ ou ăn ƀôh hop akŏm ưh đei tơklah hăm tơdrong hơrih, mă jing hơnih akŏm, tơblang păng tơroi kơ dôm tơdrong oei đei tơdrong hơrih tơpă.

Đơ̆ng pơkăp lăng noh, tơdrong tơroh đơ̆ng Kuô̆k hô̆i hăm kon pơlei tah hla ưh hơdrô̆ jĭ pơma dơnuh, tơmơ̆ng hơdrol păng đơ̆ng rŏng kơ hop akŏm. 'Noh jing tơdrong jang hơnơ̆ng: kon pơlei tah hla tơroi gah dôm tơdrong tơnap tap, hrat hrĭn; bơngai tang măt ăn Kuô̆k hô̆i pơtruh nơ̆r noh lơ̆m tơdrong hop akŏm; Kuô̆k hô̆i tơbang jing luơ̆t, tơdrong tơchơ̆t; đơ̆ng rŏng noh rim hơnih jang Kơpal kơ teh đak tơlĕch pơm kiơ̆ păng kon pơlei pơtoi hơlen lăng, pơtruh nơ̆r. Kơdră Kuô̆k hô̆i Trần Thanh Mẫn ră hơdah: “Tơdrong đei jơnei kơ 'măng hop akŏm pơtoi tơƀôh hơdah "Tơchơ̆t jang đơ̆ng Đảng trŏ hăm jơhngơ̆m đon kon pơlei", yak hơdoi, pơm kiơ̆ tơnăp tơchơ̆t chĭnh trĭ đơ̆ng Kuô̆k hô̆i, Jơnŭm pơgơ̆r teh đak, rim hơnih jang kơpal, rim tơring lơ̆m tơdrong hơmet 'lơ̆ng dôm tơdrong đei lơ̆m hơrih jang xa, ưh đei lê̆ tơhlăk tơhlĭn, hăm pơkăp: pơma 'noh jang hloi, jang trŏ, jang đei jơnei”.

Tơchơ̆t ou adoi kăl hăm rim bơngai jang tang măt ăn Kuô̆k hô̆i: Ưh hơdrô̆ tơmơ̆ng nơ̆r pơma đơ̆ng kon pơlei tah hla đĕch ôh, mă athei hơlen kiơ̆ kơjăp hăm dôm tơdrong mă kon pơlei pơtruh. Kơlih tơchơ̆t jang 'lơ̆ng kăp gĭt tơpă ah mă kon pơlei ƀôh đei tơdrong jang đei jơnei lơ̆m tơdrong hơrih. Kơyuơ noh, Kơdră Kuô̆k hô̆i athei rim bơngai jang tang măt ăn Kuô̆k hô̆i kơchăng hơlen lăng, tơtom pơtruh nơ̆r gah dôm tơdrong tơhlăk tăk oei đei lơ̆m tơdrong hơrih. Atŭm hăm noh, rim hơnih jang kơpal athei kơchăng, ưh đei gô chang, tơpŭ dih băl, ưh đei lê̆ kon pơlei păng hơnih jang mŭk drăm athei gô.

Kơdră Kuô̆k hô̆i Trần Thanh Mẫn ră hơdah, teh đak bơ̆n tŏk bŏk oei yak ăh jăl “hơtŏk jang kơtang hloh”, dôm tơchơ̆t đei hơlen lăng ah 'Măng hop akŏm ou jĭ pơkăp khôi luơ̆t kăp gĭt vă Jơnŭm pơgơ̆r teh đak, rim hơnih jang tơm, rim tơring tơlĕch jang hloi lơ̆m hơtuch sơnăm 2026, hơdrin keh đang tơchơ̆t hơtŏk 2 kơsô̆ păng dôm tơchơ̆t hơtŏk tơ-iung ăn jăl jang 2026 - 2030.

Jah vă akhan, đơ̆ng hop akŏm truh tơdrong hơrih jĭ minh tơdrong jang 2 pah. Kon pơlei tah hla pơtruh nơ̆r pơma kơ po ăn Kuô̆k hô̆i; Kuô̆k hô̆i pơm ăn tơdrong hơpơi 'meh kăp gĭt noh jing tơchơ̆t jang; păng đơ̆ng tơdrong hơrih hơlen lăng dơ̆ng tơdrong 'lơ̆ng kơ dôm tơchơ̆t noh. Ah mă kơvang dĭl vĭl noh đei pơm jang 'lơ̆ng, tơdrong tơroh đơ̆ng Kuô̆k hô̆i păng kon pơlei tah hla gô ưh đei pơdơh ah tơdrong tang măt, mă jing tơdrong yak hơdoi, hơlen lăng păng atŭm pơjing đei tơdrong hơtŏk tơ-iung.