Kiơ̆ roi tơbăt, 1 khei âu ki, kơdră đảng, khŭl kơdră tơring tơ̆ Gia Lai hlôi tơtom tơlĕch ăn hla ar athei, pơgơ̆r; jang đang tơdrong hơmet ăn bơngai jang, anih bơ̆jang păng kơmăy kơmŏk vă bơ̆jang dôm Anih pơvih ăn bơ̆jang kơ teh đak. Khŭl jang sơng iŏk hla ar hô sơ tơ̆ dôm anih pơvih pơvăn bơ̆jang đei yua, hăm hloh  163.000 hô sơ hlôi đei sơng iŏk; kơsô̆ hơmet pơ ‘lơ̆ng ƀlep khei ‘năr pơkăp đei 97,65%... Mă lei, truh dang ei dôm hla ar pơtho hăm xăh oei hơdrom băl, ƀiên chê̆ ưh kơ măh, mă loi ‘noh jĭ kang ƀô̆ joăt jang kơmăy kơmŏk kơtơ̆ng ang.

Anih jang tơmam drăm tơ̆ lơ xăh, phường ưh kơ ‘lơ̆ng, tơmam, kơmăy kơmŏk bơ̆jang ưh kơ hơtŏ băl. Tơ̆ hơnăp yan âu ‘nao tơroi, ƀok Hồ Quốc Dũng, Bí thư Anih jang Đảng dêh char Gia Lai athei dôm tơring hơnơ̆ng hơmet ming, hơmet tôm bơngai jang, pơjing trong jang bơ̆jang mĭnh trong kơjăp. Dôm anih jang athei jang hơdai pơgơ̆r dôm lăm pơhrăm ming tơdrong jang păng tơdrong joăt jang kiơ̆ trong “jang kơtă hloi” ăn kơ kang ƀô̆ xăh; tơchĕng hơlen păng tơlĕch trong jang rơih iŏk dăh mă tơplih pơlơh kang ƀô̆, bơngai jang kơteh đak rơkăh đơ̆ng dôm anih jang nai truh tơ̆ dôm anih oei ưh kơ măh. Dêh char gô ‘măn dang 250 ti hlak jên vă tơgŭm ăn kơ dôm xăh, phường răt bơ̆n tơmam, hơmet ming kơmăy kơmŏk.