Tơ̆ hnam trưng 3, hơnih klăih song 1, Hnam trưng Jăl mônh Tây Nha Trang, dêh char Khánh Hòa, hŏk tro oei sa tơ̆ kơ ‘năr oei athei vih tơ̆ hnam lơ̆m ‘năr dơ̆ng năr pêng rim giĕng, đơ̆ng rŏng ‘noh mĕ ƀă ba đe oh năm tơ̆ hnam trưng tơm vă hŏk môn Tin học. Hnam trưng kơ hơnih klăih song 1 tam mă đei lăm kơmăy vi tính, pơm ăn tơdrong pơgơ̆r hŏk đơ̆ng dôm hơnih tam mă hơtŏ. Hŏk tro tơ̆ âu kŭm hui đei tơdrong hiôk vang akŏm dôm tơdrong jang nhen hŏk tro tơ̆ hơnih klăih song tơm dăh mă tơ̆ hnam trưng tơm. Yă Nguyễn Thị Dung, mĕ hŏk tro lăm 4, hơnih klăih song 1, Hnam trưng Jăl Mônh Nha Trang tơroi tơdrong ưh kơ ‘lơ̆ng:

“Athei năm đơ̆ng hnam trưng hŏk âu truh tơ̆ hnam trưng tơm ‘mơ̆i đei lăm kơmăy vi tính vă hŏk. Rŏ đei mĕ ƀă hơyơ rơhơi  vă ‘năr dơ̆ng iŏk đang kơ ‘noh truh 1jơ 30pơnĭt kơsơ̆ chơ năm tơ̆ ‘noh hŏk lei. Lơ̆m kơ plăh ‘noh đĭ hŏk oei sa tơ̆ kơ ‘năr bơih mă lei năr Pêng rim giĕng athei iŏk vih thoi noh. Pơma atŭm tơdrong jang gô ưh kơ đei dang dôm đe mon tơ̆ hnam trưng tơm, anih jang tơmam drăm kŭm thoi noh”.

Tơmơ̆t hơdai tơjur bơngai vei lăng mă lei tam mă lăp hăm tơdrong hiôk pơtho hŏk đơ̆ng dôm hnam trưng đei vei sơđơ̆ng hơtŏ băl. Ƀơ̆t mă anih jang, tơmam drăm tam mă pơm lăp hăm ‘meh vă, hŏk tro oei pŭ ưh kơ ‘lơ̆ng, oei mĕ ƀă athei pŭ dơ̆ng tơdrong năm ba năm iŏk. Hnam trưng Jăl Mônh Tây Nha Trang đei pơjing kiơ̆ lơ̆m tơmơ̆t hơdai 7 hnam trưng, ‘noh 1 hnam trưng tơm păng 6 hơnih klăih song, hăm 198 lăm, dang 7.400 ‘nu hŏk tro. Hnam trưng hŏk jăl 2 Tây Nha Trang đei pơjing đơ̆ng 6 hnam trưng, hăm dang 5.400 ‘nu hŏk tro.

Tơdrong tơmơ̆t hơdai yak blŭng tơgŭm drơ̆ng 1 nơ̆r trong tơlĕch jang, tơdrong hơgăt păng klăih song hơnăp jang. Mă lei, kơhrĕng lăm hŏk, dôm hơnih klăih song hơtăih băl kŭm hăm tơdrong pha ra găh anih jang, tơmam drăm, tơdrong hŏk tro pơm ăn tơdrong jang vei lăng tơƀơ̆p lơ mơmat tat. Khŭl kơdră vei lăng hnam trưng athei ‘măn lơ jơ ‘năr vei lăng tơdrong jang đơ̆ng dôm hơnih hŏk, ƀơ̆t mă tơdrong hơlen lăng joăt jang, vang lăng jơ pơtho, hŏk păng băt hơdăh tơdrong thây kô pơtho, hŏk tro đei tam mă ‘lơ̆ng. Vei lăng hla ar, roi tơbăt trực tuyến ưh kơ gơh tơplih pơđĭ tơdrong kơtă kiơ̆ hơdai tơdrong jang tơ̆ rim hnam trưng, mă loi ‘noh jĭ tơdrong chă ƀôh păng tơgŭm tơtom dôm hŏk tro kăl kơ bơngơ̆t truh. Đơ̆ng yan âu ‘nâu, Anih vei lăng kon pơlei phường Tây Nha Trang apĭnh tơklăh Hnam trưng Jăl mônh păng Hnam trưng Jăl 2 Tây Nha Trang, mĭnh jăl hŏk jing 2 hnam trưng kơdih kơdih. Ƀok Nguyễn Công Danh, Phŏ Kơdră Anih vei lăng kon pơlei phường Tây Nha Trang, roi tơbăt:

“Đe oh hŏk tro Jăl 2 tŏk bŏk sơnăm păh iung, ‘noh thây kô pơtho kăl kơ kiơ̆ hơdai hŏk tro tơ̆ hnam trưng. Dang 70-80 lăm, tơdrong jang thoi noh, vei lăng ƀônh ƀiơ̆. Hăm Jăl 1, mĭnh Phŏ kơdră vei lăng ‘noh tŏk bŏk vei lăng 1 hơnih hŏk, athei vei lăng 4 hnam trưng. 4 hnam trưng ‘noh rŏ tơ jê̆ băl, hơtăih băl. Nhen tơ̆ âu, păih Hòn Nghê oei athei klĕch 1 thong đak krong. Ưh kơ kĕ vei lăng đĭ, găh đunh đai ‘noh ưh kơ sơđơ̆ng ôh”.

Khei 8/2026, dêh char Khánh Hòa pơjing trong jang proh hơmet hnam trưng hŏk, roi tơbăt păng apĭnh tơgop nơ̆r đơ̆ng Khŭl kơdră chĕp kơ̆l Anih jang Đảng dêh char. Đơ̆ng rŏng kơ proh hơmet, kơsô̆ hnam trưng hŏk jur truh 66%. Mă lei, lơ̆m dêh char oei đei 18 hnam trưng đei hloh 100 lăm, găh lơ tơ̆ dôm anih kơdrơ̆m lơ kon pơlei oei. Đơ̆ng rŏng 2 khei bơ̆jang, 1,2 tơring hlôi apĭnh tơklăh hnam trưng tih jing lơ hnam trưng dăh mă pơjing dơ̆ng hơnih klăih song. Dang ei Anih vei lăng găh pơtho pơhrăm dêh char Khánh Hòa tŏk bŏk chih akŏm nơ̆r tơgop, apĭnh đơ̆ng rim tơring vă dăr hơlen dôm hnam trưng tih, đei lơ hơnih klăih song, hnam trưng păng tơring vei lăng să, đơ̆ng noh tơgŭm trong jang trŏ lăp.