Lơ̆m kơsô̆ đe hŏk tro khoă mă blŭng kơ Hnam trưng Văn hóa Công an kon pơlei II đei oh Y Gió M'lô, hŏk tro lăm 10, bơngai M'Nông, tơ̆ plei Drang Phốk, xăh Buôn Đôn, dêh char Đắk Lắk. Mĕ ƀă lôch hơchăng yoa jĭ jăn, 5 'nu 'nhŏng oh athei arih xa gơnang băl ƀât oei đei lơ tơdrong pơmat tat. Mŏ kơdră Nguyễn Thị Ngân M'lô athei pơdơ̆h hŏk hrôih vă choh jang chă jên rong ‘me đe oh. Yoa thoi nŏh, năr Y Gió iŏk đei Hla ar krao năm hŏk Hnam trưng Văn hóa Công an kon pơlei II kŭm jing năr unh hnam đei dơ̆ng tơdrong hơmĕng.

Mŏ Nguyễn Thị Ngân M'lô pơma: "Rim sơnăm hŏk ‘noh hla ar hŏk, hơbăn ao, anih hŏk. Kơlih hnam trưng tơ̆ âu hơtaih dôm jĭt kây, ‘noh jĭ tơdrong mơmat tat hloh hăm unh hnam. Kơdih kâu inh hŏk truh lăm 9 ‘noh athei hŭt lê̆ tơdrong hơpơi meh năm hŏk đơ̆ng kơdih. Đơ̆ng rŏng kơ iŏk đei hla ar krao năm hŏk, oh inh đei mơ̆t hŏk tơ̆ hnam trưng Công an, tơdrong ‘noh ưh lăp tơdrong hơpơi ‘meh hơdrô̆ đơ̆ng oh inh, mă oei jing tơdrong hơpơi meh đơ̆ng inh hai, kŭm jing tơdrong hơmĕng đơ̆ng unh hnam hai".

Hăm Y Gió, dôm năr blŭng tơ̆ hnam trưng 'noh jĭ hơyak tih. Hơtăih kơ ŭnh hnam, pơm joăt hăm ƀok thây kô, bôl boăl păng anih oei hơdrô̆, oh sor roi băt hơdăh hơnăp jang đơ̆ng kơdih hăm 'nhŏng oh oei tơ̆ hnam: "Inh tôch 'mêm kơ 'nhŏng, 'mêm kơ mŏ, 'mêm kơ oh. Inh vă adrin hŏk pơhrăm vă pơm anih gơnang ăn unh hnam ning mônh kơnh".

Kŭm pơtơm mât lơ̆m sơnăm hŏk 'nao tơ̆ Hnam trưng Văn hóa Công an kon pơlei II, oh Hoàng Ngọc Hoa, hŏk tro lăm 10, tơ̆ xăh Ea Wer, dêh char Đắk Lắk, hơnhăk ba tơdrong arih sa đei lơ mơmat tat. Ƀok yă oh sơ̆ vang iung tơblăh, pŭ răm đơ̆ng pơgang dioxin. Ƀă oh jĭ jăn, mĕ lôch hơchăng hrôih yua đơ̆ng pơ̆k gre. Đơ̆ng 'lơ̆p, Hoa hŏk pơhrăm hơdai hăm vei lăng ƀă păng oh kơdih. Hăm ŭnh hnam Hoa, tơdrong oh đei mơ̆t hŏk tơ̆ hnam trưng 'nao 'noh jĭ tơdrong tôch ‘lơ̆ng vă oh gơ̆h hŏk pơhrăm roi 'lơ̆ng ƀiơ̆. Ưh khan lăp đei dơ̆ng tơdrong hiôk hian vă hŏk pơhrăm, anih hŏk 'nao oei tưk tơiung dơ̆ng jơhngơ̆m pran vă Hoa druh kiơ̆ tơdrong hơpơi 'meh đơ̆ng 'lơ̆p sơ̆. Đơ̆ng đon hơpơi 'mĕh pơm Công an, ŏh sor roi adrin hlŏh dơ̆ng mư̆h đei năm hŏk tơ̆ hnam trưng gĭt kăl âu:

“Đơ̆ng ‘lơ̆p inh đĭ ‘mĕh pơm Công an, ưh băt tơdrong hơpơi ‘mĕh ‘nŏh hăm đei tơpă dăh mă ưh, mă lei dang ei inh đei mât hŏk tơ̆ Hnam trưng Công an bơih, inh ƀôh tơdrong hơpơi ‘mĕh đơ̆ng kơdih kâu nhen vă đei bơih, vă ning mônh kơnh pơm anih gơnang yoa ăn ƀă inh păng inh hơpơi ‘mĕh pơlei pơla bơ̆n ling lang hiôk sơđơ̆ng”.

Kŭm hăm Y Gió păng Ngọc Hoa, đe oh hŏk tro đei tơdrong arih xa pơmat tat nai kŭm jing dôm hŏk tro mă blŭng kơ Hnam trưng Văn hoá Công an kon pơlei II. Sơnăm hŏk 2026-2027, hnam trưng chă iŏk hŏk tro tơ̆ Đắk Lắk, Gia Lai, Lâm Đồng păng Quảng Ngãi mât hŏk, hăm 34 lăm, hlŏh 1.000 'nu hŏk tro. 'Nâu jĭ hnam trưng teh đak rong đei pơjing pha ƀiơ̆, pơtho hŏk đơ̆ng jăl mônh truh jăl pêng, 'măn ăn đe oh hŏk tro đei tơdrong arih xa pơmat tat, lơ̆m noh đei kon hơ 'lơ̆p linh jĭ rơka, linh lôch tang teh đak; kon hơ 'lơ̆p unh hnam bơngai đei kŏng đei tơdrong arih xa pơmat tat; kon hơ 'lơ̆p bơngai kon kông găh unh hnam tơnuh, vă jê̆ tơnuh păng đe hơioh kăl đei tơpôl tơgŭm.

Tơdrong tơm đơ̆ng hnam trưng ưh khan lăp chơng ba hŏk tro truh tơ̆ lăm hŏk đĕch, mă oei vei lăng, pơtho pơhrăm, hơmet tôm tơdrong ăn đe oh. Anih hŏk, oei xa kơtă tơ̆ hnam trưng tơgŭm ăn đe oh đei oei xa hơdai, jê̆ hăm thây kô, đei vei lăng năng tông, băt hơdăh rim tơdrong hơpơi ‘mĕh păng tơdrong arih xa vă gơ̆h đei trong pơtho lăp ‘lơ̆ng. Dôm tơdrong pơgơ̆r pơchơt, truh lăng, pơtâp pơhrăm đon rơgei, tơdrong jang hơdai lơ̆m tơpôl kŭm đei pơgơ̆r, tơgŭm ăn hŏk tro dar deh tih vơ̆ djơ̆ ‘lơ̆ng, roi sơđơ̆ng jơhngơ̆m ƀiơ̆.

Đại tá Mai Hữu Vạn, Hiê̆u trơng Hnam trưng Văn hóa Công an kon pơlei II akhan, hnam trưng chih hơdăh, pơjing anih pơtho pơhrăm sơđơ̆ng, 'lơ̆ng hơiă, 'noh jĭ tơdrong jang tôch gĭt kăl: “Hnam trưng Văn hóa Công an kon pơlei II oei adrin vă gơ̆h jing hnam tơnŏ hiôk chơt - anih mă đe oh đei vei lăng năng tông, đei pơtho pơhrăm ‘lơ̆ng păng đei dơ̆ng đon lui vă gơ̆h yak hlŏh dôm tơdrong pơmat tat lơ̆m tơdrong arih xa".

Dôm năr blŭng mơ̆t hŏk, đe oh oei đei lơ tơdrong ưh gan hlôh vao. Mă lei găh rŏng rim hŏk tro 'noh jĭ mĭnh tơdrong arih, mĭnh tơdrong tơroi păng mĭnh tơdrong hơpơi 'meh kơdih. Hăm đe oh adrol sơ̆ oei dơ̆ng ƀât hơnăp tơdrong hơmơt hŭt hŏk yoa kơ tơnuh hin, pơmat tat dăh mă yoa trong yak hơtăih hơtŏ, hnam trưng 'nao tŏk bŏk pơih dơ̆ng 1 trong yak plơ̆ng.

Đơ̆ng dôm bơbŭng hnam oei kơƀăh kơ ƀôch truh anih hŏk pơhrăm, oei sa sơđơ̆ng ‘lơ̆ng, tơdrong mă đe oh iŏk đei ưh khan lăp tơdrong roi ‘lơ̆ng ƀiơ̆ đĕch, mă oei jing đon lui vă hơnơ̆ng yak năm tơ̆ hơnăp. Mĭnh bơbŭng hnam hŏk 'nao hlôi sơng đei đe oh hŏk tro mă blŭng păng kŭm hăm dôm năr blŭng pơm joăt hăm thây kô, bôl boăl 'noh jĭ dôm tơdrong hơpơi 'meh tŏk bŏk đei vei rong. Hăm Y Gió, 'noh jĭ tơdrong hơpơi 'meh jing bơngai ăn ŭnh hnam gơnang yoa. Hăm Ngọc Hoa, 'noh jĭ tơdrong hơpơi 'meh jing công an. Oei hăm lơ ŭnh hnam, tơdrong hơpơi 'meh ưh đei tih kiơ ‘nŏh jĭ hơpơi ‘mĕh kon hơ 'lơ̆p kơdih kâu đei hŏk chư, jing bơngai hlôh vao păng đei tơdrong arih xa 'lơ̆ng hơiă ƀiơ̆./.