Tơ̆ Cham să Chiến thắng (phường Quy Nhơn), dêh char Gia Lai pơgơ̆r Lêh pơjao iŏk lĭnh sơnăm 2026 lơ̆m jơhngơ̆m đon chhôk ‘nă. Vang truh jơ pơm lêh đei Bơngai jang lơ̆m Anih tơm Chĭnh trĭ, Kơdră Anih tơm jang tơbôl Lê Hoài Trung; Thượng tướng Trương Thiên Tô, Phŏ vei lăng Anih jang Chĭnh trĭ Khŭl lĭnh kon pơlei Việt Nam; kŭm hăm kơdră chĕp kơ̆l tơring, kang ƀô̆, khŭl lĭnh păng lơ lap kon pơlei.

Sơnăm 2026, dêh char Gia Lai đei vă jê̆ 5.700 ‘nu kon pơlei năm pơm ƀô̆ đô̆i. Tơdrong jang rơih iŏk păng krao kon pơlei năm pơm ƀô̆ đô̆i đei tơlĕch jang tơpăt. Lêh pơjao iŏk lĭnh sơnăm 2026 tơ̆ Gia Lai tơpă jing năr akŏm kơ sơnăm mơlôh tơring, hơtŏk dơ̆ng tơdrong ‘lơ̆ng vă rim lĭnh hle yak kơjăp năm pơm lĭnh, tơgop pơjing păng vei lăng Teh đak.

Hrou atŭm hăm Năr iŏk bơngai năm pơm linh, đei jê̆ 5.500 đe tơdăm hơgei kơ dêh char Đăk Lăk iung năm pơm linh, pơm jang sơnong kăp gĭt hăm teh đak. Tơ̆ 15 hơnih pơjao bơngai pơm linh lơ̆m dôm tơring tơm kơ dêh char, tơdrong kăp gĭt mă lei adoi ƀrơ̆k kơ đon.

Tơdrong jang pơjao bơngai pơm linh sơnăm ou đei lơ tơplih 'nao đơ̆ng rŏng kơ jang kiơ̆ pơkăp jơnŭm pơgơ̆r tơring 2 tăl păng tơmơ̆t hơdai hơnih jang hanh chĭnh kơ dêh char. Sơnăm ou, Đăk Lăk đei 4.600 'nu tơdăm năm pơm linh păng 849 'nu iŏk sơnong pơm Kŏng an kon pơlei. Tơdrong hŏk pơhrăm kơ đe linh 'nao tơ̆ Đăk Lăk sơnăm ou pơtoi đei tŏk hơdah, hăm jê̆ 330 hŏk đang đại học, cao đẳng, trung cấp.

Dêh char Lâm Đồng pơgơ̆r lêh pơjao, iŏk lĭnh sơnăm 2026 tơ̆ 12 hơnih lơ̆m tơring, ba hloh 4.600 ‘nu kon pơlei năm bơ̆jang hơnăp jang gĭt kăl hăm Teh đak. Sơnăm ‘nâu, akŏm hơgăt pơjao lĭnh kơ dêh char Lâm Đồng ‘noh jĭ 4.607 ‘nu kon pơlei.

Đe hơdruh tơdăm đei rơih ăn năm pơm lĭnh tă kơ đei jơhngơ̆m đon ‘lơ̆ng, đei hŏk, jơhngơ̆m pran ngăl; lơ bơngai  hŏk đang đăi hŏk, kao đăng, tơgop hơtŏk ‘lơ̆ng bơngai đei rơih. Tơdrong jang rơih iŏk kon pơlei mơ̆t pơm ƀô̆ đô̆i đei tơlĕch jang kơjăp, tơpăt, rơđăh; dôm tơdrong dăr hơlen bơngai, khăm rơih bơ̆jang tơpăt, ƀlep tơdrong hơgăt.

Lơ̆m jơ năr gĭt kăl, rim tơring lơ̆m dêh char Khánh Hòa hrơ̆p mĭnh ‘măng pơgơ̆r Pơm lêh pơjao, sơng iŏk pơm ƀô̆ đô̆i sơnăm 2026, ba 3.573 ‘nu hơdruh tơdăm năm pơm ƀô̆ đô̆i. Sơnăm ou, rim bơngai ‘nao mơ̆t pơm ƀô̆ đô̆i dêh char Khánh Hòa đei pơjao ăn năm jang tơ̆ lơ hơnih nhen: Lữ đoàn 957 (Tơring 4 Ƀô̆ đô̆i Đak dơsĭ), Hnam trương Sĩ quan Không quân, Sư đoàn Phòng không 377, Sư đoàn 2, Sư đoàn 305, atŭm hăm Hơnih Ƀô̆ đô̆i dêh char, Kŏng ang dêh char păng Hơnih Ƀô̆ đô̆i vei lăng Sơlam teh đak dêh char.

Vă sơđơ̆ng ‘lơ̆ng tơdrong krao tơmơ̆t pơm ƀô̆ đô̆i, khei năr ou ki, rim hơnih Ƀô̆ đô̆i hlôi iung jang hơdoi kơjăp hăm kơdră chĕp pơgơ̆r Đảng, chĕp pơgơ̆r tơring, Mặt trận păng rim hơnih bơ̆ jang atŏk kơtang pơtho tơbăt Khôi luơ̆t Mơ̆t pơm ƀô̆ đô̆i; vei lăng năng tông kơ jăp dôm hơdruh tơdăm tôm sơnăm mơ̆t pơm ƀô̆ đô̆i; hơlen tơdrong tơchơ̆t ‘lơ̆ng chinh trĭ, jang kiơ̆ tôm tong trong bơ̆ jang tơgŭm djru ăn hơdruh tơdăm năm mơ̆t pơm ƀô̆ đô̆i.