Hăm pơkăp sơnong jang tơnăp, rim bơngai tang măt ăn Hô̆i đŏng kon pơlei dêh char Gia Lai hlôi hơlen, pơma đam păng hơlen 21 tơchơ̆t kăp gĭt, lơ̆m noh đei 2 tơchơ̆t đei tơrĕk truh tơdrong pơkăp asong bơngai, 7 tơchơ̆t gah tơdrong tơplih jang bri vă pơm jang tơdrong nai đei tơchơ̆t lơ̆m dêh char, hăm hơgăt hloh 161 ha bri; dôm tơchơ̆t đei iŏk yua đơ̆ng năr 9/2/2026.

Pơma pơtôch hop akŏm, Phŏ Ƀĭ thư hơnih jang Tĭnh uy, Kơdră Hô̆i đŏng kon pơlei dêh char Gia Lai Rah Lan Chung ră hơdah, đơ̆ng rŏng kơ hop akŏm ou, atŭm hăm tơdrong pơm kiơ̆ Tơchơ̆t Hop akŏm bơngai tang măt jơ̆p teh đak 'măng mă 14 kơ Đảng păng Tơchơ̆t Hop akŏm Đảng ƀô̆ dêh char 'măng mă 1, Hơnih jang vei lăng kon pơlei dêh char, rim hơnih jang, rim tơring kăl akŏm pơm jang đei jơnei dôm sơnong jang tơm, vei sơđơ̆ng dôm tơchơ̆t tơlĕch dah hrôih đei tơmơ̆t jang lơ̆m tơdrong hơrih.