Kơmăng (04/08), tơ̆ Anih jang Khŭl kơdră teh đak, Thủ tướng Phạm Minh Chính pơgơ̆r ‘măng hop akŏm ‘măng mă Mônh kơ Anih pơgơ̆r jang Teh đak tơlĕch jang Tơdrong tơchơ̆t kơsô̆ 68 đơ̆ng Anih tơm Chĭnh trĭ găh hơtŏk tơiung mŭk drăm kơdih. Đơ̆ng rŏng 3 khei tơlĕch Tơdrong tơchơ̆t 68, ƀơm rơđăh hloh ‘noh jĭ tơdrong tơplih ‘lơ̆ng, tơplih lơ̆m đon tơchĕng hlôh vao đơ̆ng đĭ đăng lơ̆m tơpôl, đơ̆ng Trung ương truh tơring, khŭl jang, grŭp jang, kon pơlei, tơpôl mơdro sa, ŭnh hnam tĕch mơdro. Tơdrong pơjing tơdrong jang sa tŏk pran kơtang. Khei 6/2025 chih iŏk tơdrong tơm gĭt kăl ƀơ̆t kơsô̆ anih mơdro sa pơjing ‘nao đei hloh 24 rơbâu anih mơdro sa. Khei 7 lơ̆m teh đak đei hloh 61 rơbâu ŭnh hnam tĕch mơdro pơjing ‘nao, tŏk hloh 2 ‘măng pơting hăm sơnăm hơdrol. Tơ̆ jơ hop akŏm, Thủ tướng Phạm Minh Chính pơma hơdăh, bơ̆jang kiơ̆ tơpăt dôm tơdrong hơgăt hlôi tơlĕch ăn tơ̆ dôm Tơdrong tơchơ̆t đơ̆ng Anih tơm Chĭnh trĭ, Quốc hội, Khŭl kơdră teh đak păng athei, pơ koĕl đơ̆ng anih mơdro sa, ‘noh jĭ hơnhăk anih mơdro sa pơjing kơdih jing tơdrong ‘lơ̆ng gĭt kăl hloh hơtŏk tơiung mŭk drăm teh đak.

Thủ tướng athei hơnơ̆ng pơtrŭt hơmet pơ ‘lơ̆ng dôm tơdrong pơgăn vă anih mơdro sa gơh iŏk yua tơmam drăm, pơtho pơhrăm bơngai jang, khoa hŏk kơmăy kơmŏk, tơplih kơsô̆... Hơnơ̆ng pơjing trong jang kăt tơ jur hla ar bơ̆jang, tŭn pran klaih song hơnăp jang, hơnăp chĕp kơ̆l ăn kơ rim tơring.  Thủ tướng kŭm athei rim tơring tơmơ̆t dơ̆ng, jang pơkeh trong tơlĕch jang pơm tơdrong jang ‘nao, hơdai hăm akŏm pơjing grŭp tơdrong jang tơgŭm anih mơdro sa păh lăp păng iĕ găh anih jang kăl nhen ŭnh điên, thuê teh, jên nôp. Hơtŏk loi dơ̆ng pơma dơnuh, răp mơ̆ng nơ̆r tơgop pơjing trong jang tơgŭm đơ̆ng kon pơlei, anih mơdro sa, ŭnh hnam tĕch mơdro.