Pơma pơih blŭng hop akŏm, GS. TS Nguyễn Xuân Thắng, Kơdră Khul chih tơblang kơ Trung ương ăn tơbăt: Hop akŏm jĭ tơdrong jang tih hlŏh ‘măng mă blŭng vă hơnhăk tơdrong Tơchơ̆t đơ̆ng hop akŏm Đảng ‘măng mă XIV mât lơ̆m tơdrong arih xa. Kiơ̆ đơ̆ng noh, vă hlôh vao kơjăp nơ̆r pơtho đơ̆ng Tổng bí thư Tô Lâm ‘nŏh athei bơ̆ jang hloi đơ̆ng rŏng kơ Hop akŏm, hăm đon pơhnŏng, jang hrĕnh păng đei tơpă tơ̆ yăn âu, vang tơgop ‘lơ̆ng vă bơ̆ jang đei dôm đon pơhnŏng, tơdrong vă jang đơ̆ng Hop akŏm Đảng ‘măng mă XIV.

‘Nâu jĭ hop akŏm mă blŭng păng bơ̆n athei pơgơ̆r lơ hop akŏm, hop akŏm kiơ̆ tơdrong jang, pơma nuh mă hơlen rim tơdrong. Lơ̆m noh đei hloi tơdrong vă jang tŏk hrĕnh, kơjăp lơ̆m chăl ‘nao; tơdrong vă jang tŏk truh 2 kơsô̆ tơklep hăm pơjing dôm trong jang tŏk ‘nao, athei pơgơ̆r hop akŏm pơma nuh mă hơlen thoi âu. Bơ̆n kŭm athei đei dôm ‘măng hop akŏm pơma nuh găh atŏk tơiung khoa hŏk kơmăy kơmŏk, tơplih ‘nao rơgei mă lei athei đei trong jang kiơ̆ tơdrong Tơchơ̆t ‘nŏh, mă loi jĭ tơdrong tơchơ̆t 57, tơdrong tơchơ̆t 59, Tơdrong tơchơ̆t 66, Tơdrong tơchơ̆t 68... Pơma atŭm đei 9 trong vă jang gĭt kăl, chih hơdăh tơdrong vă jang kiơ̆ đơ̆ng Hla ar chih kăl XIV. Hla ar chih kăl dơ̆ng Hop akŏm ‘nŏh bơ̆n oei hơnơ̆ng yak kiơ̆ Hla Kơ gơ̆h hơgei đơ̆ng Đảng, vang akŏm jơhngâm vă bơ̆ jang 2 tơdrong pơhnŏng 100 sơnăm, hăm đon kơchăng bơ̆ jang gĭt kăl, jang tŏk kơdih, hơđơ̆ng jơhngâm yak mât lơ̆m chăl ‘nao. Đon pơhnŏng mă hơtuch ‘nŏh pơm hơtŏk tơdrong arih xa hiôk chơt kơ kon pơlei."”

Hop akŏm pơgơ̆r 2 ‘măng pơma nuh đei “Hơnhăk jơhngâm đon ‘nao đơ̆ng Hla ar kăl kơ Hop akŏm mă XIV mât lơ̆m tơdrong arih” păng “Hơnhăk tơdrong jang đơ̆ng Hop akŏm mă XIV kơ Đảng mât lơ̆m tơdrong arih xa”.

PGS.TS Dương Trung Ý, Kơdră chĕp kơ̆l Kơsơ̆p hla ar Cộng sản pơma hơdăh: Hop akŏm mă XIV jĭ Hop akŏm tơplih ‘nao pran ‘lơ̆ng, hơtŏk đon tơchĕng, trong vă jang păng hơmĕng jang tŏk, jĭ hop akŏm đơ̆ng đon rơgei, đon adrin păng đon pơhnŏng tih hăm dôm tơdrong tơchơ̆t gĭt kăl vă hơnhăk the đak yak tŏk pran kơjăp lơ̆m chăl ‘nao. Hla ar kăl ‘măng mă âu tơlĕch lơ nơ̆r athei bơ̆ jang rơđăh ‘lơ̆ng, ƀơ̆r pơma tơ ‘ngla bơ̆ jang hloi, chih hơdăh đon pơhnŏng, tơdrong vă jang, tơklep hăm dôm tơdrong athei đei, tơmât hơdai hăm jang tŏk pran păng jang tŏk kơjăp ‘lơ̆ng, tơmât ki luơ̆t bơ̆ jang hơdai hăm pơm lăp đon kon pơlei.

PGS.TS Dương Trung Ý, pơma hơdăh: “Mă tơpă hlôi ƀôh, kơjă đơ̆ng Hla ar kăl đơ̆ng Hop akŏm ưh lăp chih tơƀôh đon tơchĕng đĕch, mă tơm hlŏh jĭ tơƀôh dôm tơdrong đei tơ̆ yăn âu. Hla ar kăl đơ̆ng Hop akŏm lăp đei kơjă păng gơ̆h yoa ăp mă  tơƀôh hơdăh đei trong pơgơ̆r jang, hăm dôm tơdrong tơgŭm lăp ‘lơ̆ng, pơgơ̆r bơ̆ jang đei yoa, pơm tơplih ‘lơ̆ng lơ̆m tơdrong arih chinh trĭ, mŭk drăm, joh ayŏ kơ dŏ xoang tơpôl, lơ̆m rim tơdrong jang vei sơđơ̆ng teh đak, jang tơbôl kơ teh đak păng tơƀôh hơdăh tơdrong tơplih prran ‘lơ̆ng đơ̆ng yăn âu, đơ̆ng jang tŏk đơ̆ng găh tơmam drăm păng jơhngâm đon, hơtŏk đon lui đơ̆ng kon pơlei hăm Đảng, Teh đak. Vă tơgop bơ̆ jang kiơ̆ dôm trong vă jang, đon pơhnŏng lơ̆m dôm hla ar chih kăl đơ̆ng Hop akŏm mă 14 kơ Đảng, tơdrong hlôh vao, jang kiơ̆ dôm tơdrong đei ƀơm truh lơ̆m Hla ar chih kăl kơ Hop akŏm mă 14 ‘nŏh  tôch gĭt kăl păng athei jang mă‘lơ̆ng.

Pơma pơtôch hop akŏm, PGS.TS Đoàn Minh Huấn, Kơdră vei lăng Hnam hŏk Chính trị quốc gia Hồ Chí Minh akhan: Hop akŏm đei pơgơ̆r tôch tơtom, trŏ ƀlep, jang kiơ̆ hrĕnh, trŏ hăm tơdrong tơchơ̆t đơ̆ng Trung ương ‘nŏh jĭ jang hloi, ưh đei gô tơƀôh trong mă athei jăh pơgơ̆r jang kiơ̆ Tơdrong Tơchơ̆t đơ̆ng Hop akŏm mă XIV. Đon athei jăh jang đơ̆ng Hop akŏm tơƀôh hơdăh tơdrong tơplih ‘lơ̆ng kiơ̆ đơ̆ng rim nơ̆r tơgop. Dôm bơngai tang măt akŏm pơma nuh găh dôm trong jang gĭt kăl, đơ̆ng tơplih ‘nao trong jang tŏk, tưk tơiung mŭk drăm kơdih truh dôm tơdrong tih găh vei sơđơ̆ng teh đak păng jang tơbôl. Pơma hơdăh dôm tơdrong jang tơm athei jăh tơlĕch jang, ƀok Đoàn Minh Huấn athei dôm anih pơgơ̆r vang jang hơdoi roi tơbăt dôm tơdrong iŏk đei đơ̆ng hop akŏm, kiơ̆ hơnăp jang kơdih. Đơ̆ng noh, jang kiơ̆ dôm tơdrong iŏk đei đơ̆ng Tơchĕng hơlen tơdrong Tơchơ̆t Hop akŏm mă XIV kơ Đảng, tơmât lơ̆m tơdrong vă jang tơ̆ rim anih jang.

“Adrol kơ hop akŏm ‘nŏh adrin hơnhăk tơdrong arih mât lơ̆m tơdrong tơchơ̆t. Đơ̆ng rŏng kơ đei tơdrong tơchơ̆t hơdăh bơih ‘nŏh hơnhăk tơdrong tơchơ̆t mât lơ̆m tơdrong arih dơ̆ng. ‘Nâu jĭ tơdrong kăl đơ̆ng chih tơblang hăm tơdrong đei tơ̆ yăn âu, tơ̆ âu athei băt: Dôm tơdrong đei chih tơ̆ âu đei lơ tơdrong tôch gĭt kăl kơplăh dang ei, lơ̆m sơnăm 2026, đei lơ tơdrong kăl jang tôch jăl, kŭm đei lơ tơdrong kăl  jang đunh truh ning mônh đei chih tơblang tôch hơdăh, tôch tơgăl. Dôm tơdrong kăl jang tŏk ‘nŏh đei lơ tơdrong vă pơih trong jang tŏk pran, đei lơ tơdrong vă tơchĕng hơlen, đei hloi tơdrong vă jang, đơ̆ng dôm tơdrong vă jang atŭm truh tơdrong vă jang tơ̆ rim tơring.