‘Năr 4/8, tơ̆ Hà Nội, Tổng Bí thư Tô Lâm truh akŏm păng pơma tơ̆ jơ tơƀơ̆p muh măt dôm bơngai jang ‘lơ̆ng lơ̆m đĭ đăng khŭl lĭnh Kŏng an kon pơlei vang truh Hop akŏm Pơjei băl “Yua kơ tơdrong sơđơ̆ng Teh đak” ‘măng mă IX. Tổng Bí thư tơƀôh jơhngơ̆m đon ƀrơ̆k mơnat, chih iŏk păng vang tơgŭm hăm dôm bơngai hŭt hơkâu, jĭ jăn lơ̆m kơplăh bơ̆jang hơnăp jang; dôm kang ƀô̆, khŭl lĭnh tơklep pơđĭ tơdrong hơrih hăm tơdrong jang iung jang tang găn pơm glăi, ma túy hăm lơ tơdrong krê hơmơt; dôm kang ƀô̆, khŭl lĭnh năm jang tơgŭm, apĭnh năm jang tơ̆ dôm xăh sơlam, tơring hơtăih hơtŏ; dôm khŭl lĭnh ưh kơ hli ŭnh sa, đak lŏk jroh vă dŏng bơngai, dŏng mŭk tơmam; dôm bơngai pơdơh lê̆ ‘mơ̆i tơdrong hiôk chơt kơdih vă bơ̆jang hơnăp jang, vei lăng tơdrong hơrih sa sơđơ̆ng hiôk ăn kon pơlei;...

Tổng Bí thư Tô Lâm athei hơnơ̆ng tơlĕch jang đei yua tơdrong jang đĭ đăng kon pơlei vei lăng sơđơ̆ng Teh đak; pôk pơ ư, pơih să bơngai jang ‘lơ̆ng, bơngai ‘lơ̆ng, tơdrong ‘lơ̆ng tơiung tơdrong chhôk ‘nă, hơtŏk tơdrong joăt joe Bơngai nuih mơng kach mang, pơm tơdrong ‘lơ̆ng pơtrŭt kang ƀô̆, khŭl lĭnh ‘nĕ kơ pơdơh pơtơ̆p pơhrăm, hơdrin pơjei băl, khŏm bơ̆jang kiơ̆ jơnei hơnăp jang vei lăng sơđơ̆ng, pơjing khŭl lĭnh Kŏng an kon pơlei rơgoh, pran kơjăp, chính quy, gơh hơgei, ‘nao, tơgop pơjing păng vei lăng Teh đak lơ̆m tơdrong ‘nao. ‘Măng âu, Tổng Bí thư Tô Lâm păng Kơdră Anih tơm vei lăng Kŏng an Lương Tam Quang hlôi asong tơmam ăn kơ dôm bơngai jang hơgei lơ̆m khŭl lĭnh Kŏng an kon pơlei păng bơngai jang ‘lơ̆ng kơ khŭl lĭnh vei sơđơ̆ng tơ̆ tơring.