Tơ̆ hop akŏm, dôm bơngai tang măt mơ̆ng 6 hla ar chih kăl păng đei tơblang hơdăh dôm tơdrong tơm, gĭt kăl, dôm tơdrong ‘nao lơ̆m tơdrong Tơchơ̆t, Nơ̆r athei đơ̆ng Anih tơm Chinh trĭ, atŭm hăm ‘nŏh, pơm pơ ‘lơ̆ng, chih hơdăh hlŏh dơ̆ng kiơ̆ rim tơdrong jang.

Pơma nơ̆r pơtho tơ̆ hop akŏm, Tổng Bí thư, Kơdră teh đak Tô Lâm pơma hơdăh, 6 hla ar chih kăl hlôi tơƀôh hơdăh trong jang, đon pơhnŏng; tơdrong kăl vă jang đei ‘nŏh jĭ tơdrong pơgơ̆r jang păng hơnăp jang đơ̆ng bơngai chĕp kơ̆l. Rim hla ar chih kăl athei jing tơdrong jang mă rơđăh, đei bơngai chĭu pŭ, đei hơlen năng hăm dôm tơdrong jang đei tơ̆ yăn âu; mă hơtuch ‘nŏh athei pơm ăn teh đak roi pran hlŏh dơ̆ng, Kon pơlei arih xa roi ‘lơ̆ng ƀiơ̆, đon lui roi kơjăp ƀiơ̆.

Tổng Bí thư, Kơdră teh đak pơma hơdăh, 6 hla ar kăl âu hue lăng tơ̆ 1 trong ‘nŏh jĭ pơm hơtŏk tơdrong chĕp kơ̆l pơgơ̆r, jơhngâm iung tơblăh đơ̆ng Đảng; pơjing khul kăn ƀô̆ jang hơdrol, tơƀôh trong, chong glung, pơ̆n pŭ iŏk hơnăp jang kơdih; vei lăng hiôk 'lơ̆ng; hơmet ming dơ̆ng anih jang tŏk; hơnhăk chă tơmang lăng jing tơdrong jang tơm vă jang tŏk, tưk tơiung jơhngâm pran, jên hu, tơmam drăm đơ̆ng hơdrĕch hơdrung.

Tổng Bí thư, Kơdră teh đak athei, đơ̆ng rŏng kơ Hop akŏm, rim kơdră chĕp kơ̆l đảng, anih jang, tơring tơrang, bơngai chĕp kơ̆l athei băt hơdăh tơdrong jang tơm; pơjao trŏ bơngai, tôm tơdrong chĕp kơ̆l, jên jang; rơđăh tơmam jang đei, khei 'năr hơgăt păng hơnăp jang.