Kơdră Kuô̆k hô̆i bơnê kơ dôm tơdrong tơgop đơ̆ng Kơdră tang măt Olivier Brochet lơ̆m tơdrong hơtŏk tơbôl Jang hơdoi kăp gĭt Việt Nam – Phalăng, lơ̆m noh đei tơdrong jang tơbôl đơ̆ng Kuô̆k hô̆i Việt Nam păng Ngĭ viê̆n Phalăng. Kơdră Kuô̆k hô̆i akhan, tơbôl Việt Nam – Phalăng tŏk bŏk đei lơ tơdrong hiôk vă pơtoi hơtŏk kơtang, mă kăl noh đơ̆ng rŏng kơ 2 teh đak hơtŏk jang tơbôl, Jang hơdoi tôm tơdrong.

Kuô̆k hô̆i Việt Nam hơpơi 'meh atŭm hăm Ngĭ viê̆n Phalăng hơtŏk tơdrong asong khul kơpal chă hop akŏm, tơroi gah tơdrong hlôh vao lơ̆m chih akŏm khôi luơ̆t, dăr hơlen păng hơtŏk jang hơdoi kơ 2 teh đak lơ̆m lơ tơdrong jang. Kơdră Kuô̆k hô̆i Trần Thanh Mẫn pơtruh nơ̆r hăm Kơdră tang măt Olivier Brochet pơtoi pơm gơng tơroh, tơgop hơtŏk jang tơbôl Việt Nam – Phalăng roi năr roi pơih să, jang đei jơnei. Kơdră tang măt Olivier Brochet sơkơ̆t hơdah, gô pơtoi tơgop lơ̆m tơdrong hơtŏk jang tơbôl păng jang hơdoi kơ 2 teh đak, mă kăl noh lơ̆m tơdrong jang kuô̆k hô̆i.