Tơ̆ ‘măng hop akŏm, Jơnŭm pơgơ̆r kon pơlei dêh char hlôi pơdrơ̆ng kiơ̆ dôm tơdrong găh gơh kĭ ăn, ‘noh: trong jang proh hơmet anih bơ̆jang tơ̆ dêh char păng tơ̆ xăh; ăn pơdơh pơm Kơdră Anih vei lăng kon pơlei hăm ƀok Phạm Ngọc Nghị. ‘Ngoăih kơ ‘noh, Jơnŭm pơgơ̆r kon pơlei kŭm pơma dơnuh dôm tơdrong tơchơ̆t găh jên jang, tơmơ̆t jên jang teh đak, tơplih iŏk yua bri vă pơyua ăn Tơdrong jang 2 đơ̆ng trong gre kơdâu hrĕnh Khánh Hòa – Buôn Ma Thuột, păng dôm tơdrong jang tơgŭm sut hnam pơgia, hnam hiah hiok kiơ̆ athei đơ̆ng Thủ tướng Teh đak.

Yă Huỳnh Thị Chiến Hòa - Kơdră Jơnŭm pơgơ̆r kon pơlei dêh char pơma hơdăh, ‘măng hop akŏm đei lơ tơdrong kăl, ƀơm tih truh khŭl bơ̆jang păng đon jơhngơ̆m tơchĕng đơ̆ng kang ƀô̆, kon pơlei. Yă athei dôm bơngai tang măt hơtŏk jơhngơ̆m tơpăt ‘lơ̆ng, jang tơnăp vă tơchơ̆t đei yua, ƀlep tơdrong hơmĕng đơ̆ng bơngai tăh hla.