Khei năr ou ki, Jơnŭm vei lăng Kon kông kơ Kuôk hô̆i hăm 3 hơnih bơ̆ jang kĭ pơkăp Tơdrong tơchơ̆t iung jang hơdoi vă dăr lăng hơnăp jang, tơdrong jang kơ rim hơnih bơ̆ jang păng dôm tơdrong pơkăp vă tơlĕch jang rim tơdrong bơ̆ jang, sơkơ̆t hơdăh tơdrong jang, hơnăp jang păng trong iung jang hơdoi trŏ lăp, tơgŭm ăn hơnih bơ̆ jang jang ‘lơ̆ng lơ̆m tơbăt dih băl kơtơ̆ng ang, vang iung jang tơ iung pơjing khôi luơ̆t, dăr lăng, lăng hơlen păng tơlĕch trong bơ̆ jang. Bơ̆ jang hơdoi ou hlôi hơnhăk đei iŏk jơnei hơ iă, tơgop vei lăng năng tông hơrih sa, mŭk drăm, jơhngơ̆m đon kơ kon pơlei kon kông. Iung pơma pơrô̆ jang tơ̆ Hop akŏm, Kơdră chĕp pơgơ̆r Kuô̆k hô̆i Trần Thanh Mẫn akhan, tơdrong jang hơdoi vă hơnơ̆ng atok kơtang tơgoăt bơ̆ jang pơjing khôi luơ̆t, dăr lăng lơ̆m bơ̆jang vei lăng teh đak; tơmơ̆t dơ̆ng hơmet pơ ‘lơ̆ng trong bơ̆jang, hơmet pơ ‘lơ̆ng tơnap tap lơ̆m tơlĕch jang kiơ̆ hăm tơring kon kông, groi kông, sơlam teh đak; hơmet pơ ‘lơ̆ng dôm tơdrong jang tim mă ‘lơ̆ng lơm bơ̆ jang hơdoi đơ̆ng sơ̆ khơ dang ei; iung jang jơnei hloh dơ̆ng lơ̆m tơbăt ăn kơtơ̆ng ang păng dăr lăng jang kiơ̆; trŏ lăp hăm tơdrong pơkoel, tơdrong jang kơ rim hơnih bơ̆ jang lơ̆m jăl ‘nao.