Tơ̆ Hơnih jang mŭk drăm Vân Phong, dôm tơdrong jang 'nao lơ̆m tơdrong jang kơmăy kơmŏk tơgŭm tŏk bŏk pơih dơ̆ng tơdrong 'lơ̆ng ăn tơdrong jang pơm tơlĕch. Hơdai hăm Hnam kơmăy Pơm duk thŏng nan HD Hyundai Việt Nam, tơ̆ âu tŏk bŏk tơlĕch jang Tơdrong jang Hnam kơmăy tơmam pơm duk kơ Miboo Vina, jên tơmơ̆t jang 528 ti hlak jên, đei hơmĕng tơmơ̆t dơ̆ng tơdrong 'lơ̆ng ăn tơdrong jang pơm duk. Ƀok Nguyễn Văn Trãi, Kơdră vei lăng Miboo Vina, tơbăt:

“Găh lơ ‘noh tơdrong jang pơlăp, tơmam, kăt hơmet kim loăi ‘noh tơm oei jing ki sư Việt Nam, dôm bơngai kơtă pơgơ̆r pơm tơlĕch adoi lơ noh bơngai Việt Nam. Dang ei bơ̆n jang ‘noh kŭm ‘lơ̆ng dêh bơih. Minh tơmam pơm ‘lơ̆ng đei bơ̆jang tơ̆ ‘ngoăih, tơplih yua kơ adrol ki đe pơm tă lơ lơ̆m hnam kơmăi Hyundai đĕch. Dang ei kơsư̆k jang đơ̆ng đe sư ưh kơ măh, nhôn tơmơ̆t tơmam lơ̆m noh vă đe sư pơlăp dơ̆ng hrĕnh hloh, hơtŏk kơsô̆ duk lơ̆m minh sơnăm.”

Kŭm hăm ming man, kơmăy kơmŏk, tơmang lăng tŏk bŏk jing jơhngâm pran tơm kơ tơdrong jang tŏk. 9 khei, Khánh Hòa sơng đei hlŏh 20,4 triu 'nu tơmoi, tơmoi đơ̆ng teh đak đe hlŏh 7,1 triu 'nu; iŏk yoa vă jê̆ 68.000 ti hlak jên, tŏk 21%. Festival Đak dơsĭ Khánh Hòa 2026, Năr joh ayŏ kơ dŏ xoang kơ hơdrĕch Chăm 'măng mă VI păng Miss World 2026 pơjing dôm tơdrong 'lơ̆ng hơiă, vang tơgop roi tơƀôh um rup, joh ayŏ păng tơmam chă tơmang lăng kơ dêh char. Tơdrong chă tơmang lăng tŏk 2 kơsô̆ hơnhăk ba tơdrong jang atŏk tơiung pơvih pơvăn, chơ chuĕn, tĕch mơdro đơ̆ng dôm tơring. Yă Thái Thị Lệ Hằng, Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Khánh Hòa, tơbăt, anih chă tơmang lăng oei hơnơ̆ng vei hơnăp jang tơm mŭk drăm kơ Khánh Hòa lơ̆m dôm khei truh:

“Hơpơi 'mĕh jê̆ truh gô sơng đei mĭnh khŭl tơmoi Trung Quốc tôch kơ lơ, hơnơ̆ng đei dôm khŭl tơmoi nai đơ̆ng dôm teh đak nai; anih tĕch mơdro lơ̆m teh đak kŭm đei lăng kăl. Anih jang gô hơnơ̆ng tơchă dôm anih jang hơdai vă pơgơ̆r dơ̆ng lơ tơdrong jang vă hơtŏk 'lơ̆ng tơdrong chă tơmang lăng, lơ̆m noh oei lăng kăl tơdrong joh ayŏ kơ dŏ xoang 'nŏh jĭ tơdrong ‘lơ̆ng đơ̆ng mŭk drăm chă tơmang lăng, hơtŏk tơiung dơ̆ng lơ tơmam chă tơmang lăng 'lơ̆ng hơdrô̆."

Găh dôm tơdrong tam mă 'lơ̆ng, kơsô̆ tŏk 8,7% đơ̆ng tơdrong jang kơmăy kơmŏk 'noh tŏ sĕt hloh trong tơlĕch ăn. Jên jang logistics, tơplih đơ̆ng anih tĕch mơdro lơ̆m apŭng plĕnh teh păng vei lăng ŭnh điên hơnơ̆ng pơm kơhret ăn pơm tơlĕch kơmăy kơmŏk kơ tơring. Vă pơm lăp hăm tơdrong 'nao, dôm anih mơdro sa athei đei trong jang tơgŭm hơdrol kơmăy kơmŏk pơm tơlĕch, pơm pơjing đei kơjă tŏk lơ, hơtŏk tơiung kơmăy kơmŏk tơgŭm păng hơmet pơ 'lơ̆ng tơnap tap ăn dôm anih jang tŏk hiơ̆.

Yă Trịnh Thị Hồng Vân, Kơdră Jơnŭm jang lơ̆m Kŏng ti Yến sào Khánh Hòa tơbăt, mă đơ̆ng ‘meh đei tơdrong tơgŭm pơm tơlĕch, anih mơdro sa oei lăng tơdrong hơdrin kơdih ‘noh tơm:

“Lơ̆m khei 'năr dêh char oei mơ mat tat thoi âu, găh kơ sô̆ jang kơmăy kơmŏk, kŏng ti kŭm gô hơ drin vă đei jang tŏk dang 30 - 35%, păng gô hơdrin jang kiơ̆ tơdrong hơgăt âu.”

Kiơ̆ kơ ƀok Nguyễn Việt Hùng, Kơdră Anĭh vei lăng kon pơlei dêh char Khánh Hòa, tơdrong hơgăt jang tŏk kơ tơring oei tơ̆ kơsô̆ ‘lơ̆ng. Trŭh dang ei, dêh char 'nao tơlĕch jên tơmơ̆t jang kơ tĕh đak đei 70%, hơmet pơ ‘lơ̆ng đei 106/257 tơdrong jang đei tơhlăk tơhlĭn. Tơdăh tơlĕch 100% păng hơmet pơ ‘lơ̆ng dơ̆ng tơdrong jang, Khánh Hòa gô pơvei đei kơsô̆ tŏk hloh 11% kơ 9 khei. Ƀok Nguyễn Việt Hùng akhan, hơgăt jang tŏk tôch kơ lơ, mă lei tơdrong jang tŏk oei pơmơ̆ng lơ̆m tơdrong bơ̆jang kiơ̆ đơ̆ng khŭl jang chĭnh trĭ:

“Tôch kơ lơ tơdrong jang gĭt kăl mă Trung ương oei bơngơ̆t truh, mă kăl 'noh bơ̆n hăm tơplih đei tơdrong 'nâu ưh? Hơnăp jang đơ̆ng bơ̆n 'noh jĭ iŏk pơ ‘ngoăih teh, 'nâu jĭ tơdrong tơm vă tơdrong jang đei bơ̆jang kiơ̆ trong tơlĕch jang. Tơdrong jang tơmơ̆t jên jang 'noh bơ̆n jang tŏk, mă jang tŏk găh lơ ‘noh  yua đơ̆ng tơdrong bơ̆jang kiơ̆ hơgei. Tơnap yă kiơ 'noh 'nhŏng oh bơ̆n vang hơmet pơ 'lơ̆ng."

Pơtôch 9 khei hlôi pơm đei tơdrong 'lơ̆ng vă Khánh Hòa jang kĕh tơdrong hơgăt jang tŏk 2 kơsô̆ sơnăm 2026. Ƀai toan tơ̆ hơnăp 'nŏh jĭ tơplih jên tơmât jang, pơm tơlĕch, chă tơmang lăng păng tơdrong 'lơ̆ng Vân Phong jing tơdrong jang tŏk tơpă, kơjăp 'lơ̆ng.