Tơdrong jang Hơdruh tơdăm năm jang tơgŭm pơyan he sơnăm 2026 tơ̆ Đăk Lăk sơng đei hloh 130.000 'nu bơngai jang, hăm vă jê̆ 4.000 tơdrong jang tơgŭm ăn tơpôl. Dôm khŭl jang tơgŭm Pơyan he bơ̆jang 144 tơdrong jang hăm kơsô̆ jên vă jê̆ 2 ti hlak jên. Tơdrong jang vei lăng đe hơioh đei tơlĕch jang hăm 318 lăm pơtho glơi ưh kơ iŏk jên păng vă jê̆ 5.000 kơsuơ̆t jên hŏk ƀŏng hơpăh ăn đe hŏk tro mơmat tat.

Đĭ đăng 102 xăh, phường lơ̆m dêh char vang tơlĕch khŭl pơtho pơhrăm kơmăy sô̆, tơgŭm hơtŏk đon hlôh vao găh kơmăy sô̆, hơmet ming trong pơm hla ar păng kla jên ưh kơ yua jên măt ăn hloh 145.000 'nu hơioh păng kon pơlei.

Đơ̆ng rŏng kơ tơdrong jang tơgŭm pơyan he, tơdrong tơgŭm ăn kon pơlei iŏk yoa kơmăy sô̆ tŏk bŏk đei bơ̆ jang hơnơ̆ng kiơ̆ Tơdrong jang 44 măng năr "Druh dăm Đăk Lăk năm hơdrol lơ̆m tơdrong tơplih hăm kơmăy sô̆". Dôm khul jang hlôi tơgŭm pơm hloh 64.700 blăh hô sơ hăm kơmăy trư̆k tuyê̆n, pơtho ăn hloh 27.200 unh hnam, bơngai tĕch mơdro kla jên hăm QR dăh mă tĕch mơdro hăm kơmăy sô̆.

Kiơ̆ 'nhŏng Y Lê Pas Tơr, Phŏ Kơdră chĕp kơ̆l Anih jang Đoàn dêh char, Kơdră vei lăng Khul druh dăm Việt Nam dêh char Dak Lăk, rim khul jang oei hue lăng truh tơdrong pơtho tơƀôh vă đơ̆ng rŏng kơ chă tơgŭm ăn, kon pơlei gơ̆h iŏk yoa kơmăy sô̆ kơdih.

"Lăp đơ̆ng rŏng dôm 'măng bơ̆ jang tơgŭm pơyan he 'noh nhôn hơnơ̆ng ăn bôl boăl bơ̆ jang dơ̆ng lơ tơdrong jang, đơ̆ng rŏng kơ "pơyan he pơhrăm kơmăy sô̆" tơplih jing tơdrong jang 44 măng năr 'noh đe boăl hơnơ̆ng bơ̆ jang dơ̆ng tơdrong jang kơdih. Nhôn kŭm pơtho tơƀôh đơ̆ng rŏng dôm 'măng bơ̆ jang tih âu 'noh, ưh kơsĭ tơdrong jang đơ̆ng kơdih tôch bơih ôh, mă tơdrong jang tơgŭm tơ̆ tơring, tơ̆ anih jang, kăl loi jĭ tơdrong đei ƀơm truh tơplih hăm kơmăy sô̆, jĭ 1 tơdrong jang athei jang hơnơ̆ng păng athei tơmât kơjăp hăm dôm tơdrong jang, dôm nơ̆r pơtho đơ̆ng khul chĕp kơ̆l đảng păng khul kơdră pơgơ̆r tơring dơ̆ng".