'Nâu jĭ Tơdrong jang đei tơmât hơdai đơ̆ng 4 tơdrong jang tơm kơ tĕh đak adrol ki jing mĭnh tơdrong jang hrơ̆ch, đei: Pơjing tơring tơrang 'nao, tơjur dơnuh hin kơjăp 'lơ̆ng, atŏk tơiung mŭk drăm - tơpôl tơ̆ tơring kon pơlei kon kông păng groi kông; Atŏk tơiung jŏh ayŏ kơdŏ xoang; tơplih ‘nao, hơtŏk tơ drong 'lơ̆ng mưh pơ tho pơ hrăm; vei lăng jơhngâm pran, kơsô̆ kon pơlei păng atŏk tơ iung. Akŏm jên jang kơ sơnăm 2026-2030 'nŏh vă jê̆ 880.000 ti hlak jên (lơ̆m noh jên jang Trung ương 'nŏh 345.000 ti hlak jên); tơgŭm hơdrol ăn dôm tơring tơnap tap.Jên jang đơ̆ng tơdrong jang akŏm trŏ lăp hăm tơdrong tơm tơlĕch ăn kon pơlei đei iŏk yua sa hơpăh, ưh kơ gơh iŏk yua vă kla jên khei dăh mă bơ̆jang hơnơ̆ng kơ hơnĭh bơ̆ jang.

Trung ương pơjao ăn tơring vei lăng rim tơdrong jang iĕ, ki thuơ̆t ƀônh. Dôm tơdrong jang hơla kơ 500 triu hlak jên gơ̆h pơjao kơtă ăn tơpôl kon pơlei bơ̆ jang. Tơ̆ hop akŏm, Thủ tướng Lê Minh Hưng athei tơmât hơdai dôm tơdrong jang tơm kơ teh đak athei pơm tơplih 'lơ̆ng lơ̆m tơdrong vei lăng, tơjur anih jang, tơjur hla ar pơm păng hơmet pơ 'lơ̆ng tơdrong tơklăh băl, hơdrom băl; hơtŏk ‘lơ̆ng tơdrong đei yoa mưh iŏk yoa dôm jên jang; akŏm jên jang teh đak vă tơmât jên jang đei tơdrong jang tơm, gĭt kăl. Thủ tướng pơjao ăn Kơdră Anih vei lăng kon pơlei dôm dêh char, pơlei tơm kơtă pơm Kơdră Anih pơgơ̆r jang kơ dêh char păng jăh jang đang tơdrong hơmet ming anih jang adrol kơ 'năr 25/10 truh. Dôm tơring athei akŏm tơlĕch jên jang mă ‘lơ̆ng dang 12.000 ti hlak jên jên jang đơ̆ng jăl jang 2021 - 2025 truh sơnăm 'nâu.