Dôm năr 'mi tih pơdui đunh, tơ̆ kông Một, phường Quy Nhơn, dêh char Gia Lai, oei hơnơ̆ng tơtăm kơ teh hơlih. Tơ̆ jih kông, lơ tŏ hnam oei hơgrêng. Tơ̆ hơla jơ̆ng kông, mĭnh ƀar tŏ hnam đei teh tơmo klơ̆p 1 păh, lơ unh hnam athei tơplih oei tơ̆ nai.

Yă Phạm Thị Thùy, Bơngai pơgơ̆r kueng kơphô̆ 19, phương Quy Nhơn tơbăt, găh lơ hnam oei lơ̆m tơring ou kơ yuơ kon pơlei muih roh choh klăng, chă ming man kơdih đang kơ 'noh tĕch mơdro, pơjao dih băl lơ 'măng. Sơnăm 2025, ƀơ̆t tơdrong teh tơdrŭt hơlih đei ƀôh kơtang, hlôi đei 9 ŭnh hnam lĕch vĕh, dang ei oei pă 27 ŭnh hnam oei tơ̆ ou. Tơdrong ưh kơ măh hla bơar trŏ khôi luơ̆t pơm ăn trong jang tơgŭm, hơmet ăn hơnih oei ăn kon pơlei tơƀơ̆p tơnap tap:“Trong jang đơ̆ng dêh char găh tơdrong pôk rĭ unh hnam kon pơlei ‘noh găh lơ unh hnam kon pơlei tơgŭm. Mă lei đei minh ƀar unh hnam ưh đei lăp đon yua đơ̆ng đe sư muih roh choh khăng păng athei asong teh. Ƀơ̆t mă dêh char tơgŭm lăp tơgŭm minh păh yơ, yua kơ kon pơlei ưh đei hla bơ ar yua teh kơna kiơ̆ tơdrong hơgăt lăp tơgŭm 1 păh kon jên vă man dăh mă oei tơ̆ dôm hơnih sơđơ̆ng ƀiơ̆, ưh kơ oei tơ̆ dôm anih hli hlơt teh hơlih.."

Tơring kon pơlei oei tơ̆ kông Một pơjing đĭ hlŏh 20 sơnăm. Tơ̆ hơnăp tơdrong teh hơlih roi đunh roi krê hơmơt, tơring tŏk bŏk hăt hot jang hơdoi hăm Anih vei lăng ming man, Anih vei lăng choh jang xa păng cham char Gia Lai dăr hơlen, tơlĕch trong jang yông dôm unh hnam kon pơlei lơ̆m tơring krê hơmơt, atŭm hăm 'nŏh tơchĕng hơlen trong hơmet pơ 'lơ̆ng, hơmet ming tơring.

Ƀok Nguyễn Đức Toàn, Kơdră Anih vei lăng kon pơlei phường Quy Nhơn, tơbăt:“ Dang ei dêh char tŏk bŏk pơgơ̆r hăt hot pơjao ăn dôm anih jang kơpal păng Anih vei lăng kon pơlei phường Quy Nhơn dăr hơlen, tơgŭm tơlĕch trong jang vă bơ̆jang kiơ̆ hơnăp jang yông dôm unh hnam kon pơlei lơ̆m tơring âu. Mưh 'mi kial hơbŭt đei ƀôh phường hlôi kơchăng trong jang yông dôm unh hnam oei lơ̆m tơring krê hơmơt teh hơlih gô đei ƀôh truh anih oei sơđơ̆ng”.

Tơdrong tơchơ̆t yông kon pơlei lĕch đơ̆ng tơring teh hơlih kông Một ưh khan lăp jing ‘meh vă kăl hloh vă vei lăng hơkâu jăn, mŭk drăm, mă kăl đei trong tơgŭm păng hơmet ăn anih oei hle mă trŏ lăp, vei sơđơ̆ng tơdrong hơrih sa đunh đai ăn kon pơlei. Vă tơdrong hơpơi 'meh oei sa sơđơ̆ng jing tơpă, khul kơdră chĕp pơgơ̆r păng rim hơnih bơ̆ jang kơpal kăl tĕnh koăng hơmet pơ 'lơ̆ng tơnap tap, tŭn hrĕnh rim trong jang yông, pơjing hơnih oei hle, tơgŭm ăn kon pơlei sơđơ̆ng hơrih sa.