Sơnăm 2026, tơdrong choh jang xa kơ tơring Tây Nguyên păng tơring tơter đak dơsĭ Pơbah Tŏk bŏk pơtoi đei hơtŏk sơđơ̆ng. Teh pơtăm ƀa đei pơhlom  782.000 ha, đei yua jê̆ 65 tạ/ha, ƀa đei yua hloh 5 triu tâ̆n. 'Long xa plei đei yua hloh 3 triu tâ̆n. Hăm 'long pơtăm kŏng ngĭp, kaphê pơtoi jing 'long pơtăm tơm lơ̆m tơdrong tĕch tơlĕch ăn teh đak đe, đei yua hloh 6,5 tih đôlar. Lơ̆m tơring đei hloh 2.000 kơsô̆ pơkăp tơring pơtăm hăm teh să 57.000 ha păng hloh 600 hơnih tah 'nŭng. Mă lei tơdrong jang tơ̆ tơring tơter đak dơsĭ Pơbah Tŏk bŏk păng Tây Nguyên adoi oei ƀơm tơnap tap kơyuơ kơmăi kơmŏk rei pơtăm oei kơđeh, tơdrong yua hơdrĕch tam mă trŏ kiơ̆ tơdrong kăl, pơrang pơrăm 'long pơtăm tơm păng dôm tơdrong tơchơ̆t kơ tơring tĕch răt roi năr roi kơhret kơtang.

Hăm hơyuh El Nino pơm tŏ phang pơđang, tŏ 'mi kial ưh đei sơđơ̆ng, rim tơring pơtruh nơ̆r pơklaih tơnap tap gah hơbong thong đak, vei lăng tơmam choh pơtăm păng pơgơ̆r pơm jang athei pơtrŏ. Tơ̆ jơ hop akŏm, Hơnih tơm Choh jang xa păng Cham char ră hơdah, tơchơ̆t hơtŏk tơdrong 'lơ̆ng hăm tơmam choh pơtăm, pơm jang athei trŏ tơchơ̆t păng hơtŏk tơdrong tơguăt đơ̆ng bơngai jang mir, hơp tak xah hăm hơnih jang mŭk drăm. Hăm tơdrong mă hơyuh El Nino pơm tŏ phang pơđang, rim tơring athei chih akŏm trong jang vă tơjră, hơlen lăng hơbong thong đak păng pơnơ̆ đak, hơmet pơyan choh jang, pơkăp 'long pơtăm mă trŏ ƀlep, ưh đei lê̆ răm mưh đei tŏ phang pơđang truh.