Hop akŏm đei pơdăh trư̆k tuyên đơ̆ng tơring Phú Thiện truh rim tơring, phương: Ayun Pa, Ia Rbol, Ia Sao, Pờ Tó, Ia Pa, Ia Tul, Phú Túc, Ia Dreh, Ia Rsai, Uar, pơjing rơvơn vă lơ bơngai tăh hla vang tơƀơ̆p, tơroi tơbăt jơhngơ̆m đon hơpơi ‘meh vă, tơgop nơ̆r hăm Kuô̆k hô̆i, rim hơnih bơ̆ jang Trung ương păng tơring. Bơngai tăh hla rim tơring, phương hlôi tơroi tơbăt găh tơdrong hơrih sa: tơdrong tơgum djru hơmet pơ ‘lơ̆ng đơ̆ng ‘mi kial pơrăm, tơgum djru hiong răm đơ̆ng rŏng ‘mi kial pơrăm, ming hơmet trong nơnăm tơring tơrang, hơmet ming hơnih pơtruh đak sŏ nhă rơgoh, tơdrong xek tơlang tơgum djru ăn bơngai jang pơdơ̆h bơ̆ jang kiơ̆ Tơdrong tơchơ̆t 178. ‘Ngoăih dôm tơdrong hơrih sa kơ kon pơlei, bơngai tăh hla jei tơbăt jơhngơ̆m đon tơtăm găh tơdrong proh hơmet tơring bơ̆ jang. Tơgoăt iŏk nơ̆r tơgop đơ̆ng bơngai tăh hla, Kơ iĕng Kơdră chĕp pơgơ̆r Kuô̆k hô̆i Nguyễn Hồng Diên pơma hơdăh, Trung ương ưh kơ đei trong vă hơnơ̆ng hơgrop dơ̆ng dêh char, tơring. Gô mơ̆ng kiơ̆ tơdrong ‘meh vă yan ou mă rim dêh char gô lăng hơlen proh hơmet ming kâp tơring mă trŏ lăp, jơnei ‘lơ̆ng.