Lơ̆m ‘măng mă ou, UNICEF tơgŭm ăn 450 kơthŭng mong đak kơ loăi 1.000 kơlich ăn kon pơlei tơ̆ 3 tơring Ea Phê, Cư Pui păng Krông Pắk, dêh char Đắk Lắk. Dôm bơngai đei tơgum djru ‘noh dôm ŭnh hnam ưh kơ măh đak sŏ nhă rơgoh. Tơdrong jang lăng kơjăp ŭnh hnam dơnuh, vă jê̆ dơnuh, ŭnh hnam kơ yuơ drŏ kăn chĕp kơl păng ŭnh hnam đei hơ ioh, mă kăl hơ ioh hơven hơmo jo jăn. Atŭm hăm tơgŭm djru rim ŭnh hnam, tơdrong jang oei lăng hơlen ƀơk ăn kơthŭng mong đak ăn dôm hnam trương đei tơdrong ‘meh vă kăl hloh, tơgop pơm sơđơ̆ng đak măh mai pơvih pơvăn ăn hŏk tro păng ƀok thây kô pơtho. Tơdrong ƀơk ăn kơthŭng mong đak đei tơlĕch jang lơ̆m khei ‘năr rim tơring tŏk bŏk tơlĕch jang hơmet ăn tơjră tang găn hăm tŏ phang pơđang, ưh kơ măh đak sŏ nhă, mă kăl lơ̆m pơyan phang 2026-2027.