Sơng iŏk nơ̆r krao hơvơn đơ̆ng Ƀok Pơtao teh đak Đan Mạch Frederik X păng Hơkăn Ƀok, Kơdră Jơnŭm chĕp kơ̆l Châu Âu António Costa păng Thủ tướng teh đak Bỉ Bart De Wever, pơgê hei, ‘năr 19/10, Tổng Bí thư, Kơdră teh đak Tô Lâm kŭm hăm Hơkăn ƀok păng khul tang măt ăn teh đak Việt Nam năm ngôi tơ̆ teh đak Đan Mạch, năm ngôi tơ̆ EU păng teh đak Bỉ đơ̆ng ‘năr 19 -24/10 sơnăm 2026.

'Măng năm ngôi tơ̆ teh đak Đan Mạch đơ̆ng Tổng Bí thư, Kơdră Teh đak Tô Lâm tơƀôh hơdăh khei ‘năr tôch gĭt kăl lơ̆m tơdrong pơvei đơ̆ng ƀar teh đak, tơƀôh hơdăh trong jang đunh đai, đon pơhnŏng chinh trĭ păng đon lui kơjăp đơ̆ng khul kơdră chĕp kơ̆l ƀar teh đak, atŭm hăm ‘nŏh pơjing đei jơhngâm pran ‘nao hơnhăk tơdrong pơvei Việt Nam-Đan Mạch tŏk ‘lơ̆ng hlŏh dơ̆ng.

Hăm EU, 'măng năm ngôi âu 'noh jĭ jơnăr vă ƀar păh pơm hơtŏk loi dơ̆ng dôm tơdrong jang hơdoi tơm gĭt kăl, mă loi găh tĕch mơdro, tơmơ̆t jên jang, jang khoa hŏk – kơmăy kơmŏk, pơtho bơngai jang, kiơ̆ đơ̆ng noh pơjing tơdrong pơvei Việt Nam- EU jing trong jang 'lơ̆ng hơiă lơ̆m tơdrong jang hơdoi ASEAN-EU.

Hăm Bỉ, 'măng năm ngôi vă ƀar păh pơjing hơyak tŏk gĭt kăl mưh jang hơdoi lơ̆m dôm tơdrong jang mă Bỉ đei tơdrong pran ‘lơ̆ng păng Việt Nam oei akŏm jơ hngâm bơ̆ jang nhen khoa hŏk - kơmăy kơmŏk, chip bán dẫn, unh hơyuh rơgŏh, choh jang xa rơgoh păng tơplih 'nao rơgei, logistics păng tơnŏk duk rơgei.