Dôm năr ou ki, rim Hơnih bơ̆ jang pơm hla bơar tơ̆ dêh char Lâm Đồng hlôi sơng iŏk đei mơjĭt rơbou hô sơ păng hlôi pơm keh đang hloh 97%, dơ̆ng mă 7 lơ̆m teh đak găh tơdrong bơ̆ jang pơm hla bơar. Vă kon pơlei hơnơ̆ng đei pơm ăn hla bơar keh đang ƀlep jơ ‘năr pơkă, rơvơn hloh, Hơnih vei lăng kon pơlei dêh char Lâm Đồng hlôi pơgơ̆r pơtho ming ăn hloh 5.000 ‘nu kang ƀô̆ bơ̆jang tơ̆ Hơnih bơ̆ jang pơm hla bơar tơring; xek tơlang keh đang tơhlăk tơhlĭn hô sơ găh groi teh kơ yuơ ưh kơ măh kơyâu; hơmet pơ ‘lơ̆ng tơdrong tơnap tap găh internet, măi kmŏk răk mong; pơjing 3 Khul bơ̆ jang kơ dêh char iung năm bơ̆ jang, tơgŭm djru ăn rim tơring hơmet pơ ‘lơ̆ng tơhlăk tơhlĭn, tơnap tap, tơlĕch jang tơtom rim tơdrong jang kăl…

Ƀok Hồ Văn Mười, Kơdră chĕp pơgơ̆r Hơnih vei lăng kon pơlei dêh char Lâm Đồng tơbăt, dêh char tŏk bŏk iung jang ‘lơ̆ng bơ̆jang kang ƀô̆ vă khul kơdră chĕp pơgơ̆r ƀar kâp bơ̆ jang ‘lơ̆ng, jơnei: “Tơdrong rơvơn kăl hloh ‘noh kang ƀô̆ băt hlôh ƀôh hơdăh trong chĕp pơgơ̆r khul kơdră 2 kâp đơ̆ng dêh char jur truh tơ̆ tơring, tơring kăl tôch hơdăh, hơnăp jang kơtang kơna kĕ yak hloh tơdrong tơnap tap. Nhôn năm tơ̆ ou bơ̆ jang găh tơdrong proh hơmet khul kang ƀô̆. Pơtih gia đei phương đei 2, 3 ‘nu kang ƀô̆ ‘noh hơgei găh khoa hŏk kmăi kmŏk mă lei hơdrơ̆k dơ̆ng đei phương ưh kơ đei bơngai ayơ dăhj mă đei mălei ưh hơgei, tim lăh jang. Đơ̆ng noh găh tơdrong lơ̆m bơ̆ jang hơlen groi teh, kiơ̆ kơ ‘noh kơna proh hơmet dơ̆ng khul kang ƀô̆ mă hơtŏ dih băl lơ̆m 124 tơring, phương, tơring kăl”.

Atŭm hăm hloh 5.000 ‘nu kang ƀô̆ tơ̆ Hơnih bơ̆ jang pơm hla bơar tơring, dêh char Lâm Đồng chă hơvơn đei 1.200 ‘nu hơdruh tơdăm đơ̆ng 124 hơnih bơ̆ jang tơring, phương, tơring kăl lơ̆m dêh char vă bơ̆ jang tơgŭm ăn tơring bơ̆ jang păng tơplih kơsô̆. Hơdruh tơdăm năm jang chă pơtho ăn kon pơlei kơtĭt kơsô̆, kai tơmơ̆t dơ̆ng hơnăn điên tư,pơm tai khoan kon pơlei điên tư ... Adoi pơtho tơbăt păng tơgŭm djru tơƀôh tơbăt kơtơ̆ng ang kăl găh tơdrong pơm hla bơar, bơ̆ jang kiơ̆ trư̆k tuyên.

Kiơ̆ đơ̆ng ƀok Bùi Quốc Huân, Kơdră chĕp pơgơ̆r Hơnih vei lăng kon pơlei tơring Lạc Dương, dêh char Lâm Đồng, ‘nou jing tơdrong jang tôch gĭt kăl, tơgop pơm hơtŏk jang ‘lơ̆ng kơ Hơnih bơ̆ jang pơm hla bơar đei bơ̆ jang ‘lơ̆ng, pơm dă ƀiơ̆ tơhoach jơ ‘năr lơ lơm sơng iŏk păng pơm pơkeh hô sơ, mă kăl tơ̆ tơring hơtăih yăih,tơring kon kông oei tim gan măt iŏk yoa kmăi kmŏk lơ̆m điên thoăi smarphone. Ƀok Bùi Quốc Huân, tơbăt: “Mưh kon pơlei năm pơm hla bơar, lơ̆m bơ̆ jang hăm kmaiw kmŏk điên tư toim mă joăt ‘noh đei khul hơdruh tơdăm ou tơgŭm. Ba jei hlôi pơrô̆ athei khul kŏng ang tơring vang jang tơgŭm ăn kon pơlei, bơngai ayơ tim mă kĭch hoăt VneID ‘noh pơtho ăn đe sư. Atŭm hăm ‘noh dăr lăng dơ̆ng măt bơngai kon pơlei iŏk yoa điên thoăi smarphone dôm yơ vă tơlĕch ăn rim trong jang. Mă kăl ‘noh mưh kon pơlei năm pơm hla bơar ‘noh nhôn jei vang chă tơgŭm ăn keh đang 100%”