Khul kơpal hlôi truh hơpong ngôi, thơ thou Têt tơ̆ dôm Kơđông linh vei sơlam Yok Đôn, Bo Heng păng Đăk Ruê. Khul kơpal dêh char Đăk Lăk chă apinh jet gia pơma dơnuh, băt hơdah tơdrong pơm jang, kơchăng tơjră kơnê̆, vei sơđơ̆ng tơdrong pơgơ̆r kơdih, vei sơđơ̆ng tơpôl tơring sơlam lơ̆m khei Têt juăt jue kơ kon pơlei. Khul kơpal kơ Hơnih jang vei lăng kon pơlei dêh char Đăk Lăk tơroi, sơnăm 2025 ou ki tơjră hăm lơ tơnap tap, chŏng mă dêh char adoi oei đei jơnei kăp gĭt lơ̆m hơtŏk mŭk drăm tơpôl.

Tơmơ̆t lơ̆m jên mong đei jê̆ 18.000 tih hlj, tŏk hloh 30% pơtêng hăm pơkăp Trung ương pơjao, tơmam drăm tĕch ăn teh đak đe đei hloh 2,8 tih đôlar. Dêh char hmach bơnê kơ dôm tơdrong tơgop tih tên đơ̆ng khul linh, lơ̆m noh đei Ƀô̆ đô̆i Kơđông vei sơlam teh, hlôi tơgop vei sơđơ̆ng tơpôl tơring tơrang, vei kơjăp tơdrong pơgơ̆r sơlam teh đak, jing kăp gĭt hloh hăm tơdrong sơđơ̆ng păng hơtŏk tơ-iung. Kơdră kơ dôm kơđông linh vei sơlam teh tơroi: khul linh hlôi kơchăng dôm trong jang tơjră kơnê̆, vei sơđơ̆ng tơnăp lơ̆m khei Têt Nguyên đán Bính Ngọ 2026; atŭm hăm noh, rim hơnih linh adoi hăt hot pơgơ̆r dôm tơdrong jang pơyua ăn tơpôl nhen “Puih mak Kơđông vei sơlam teh tơnŏ đon bơnôh kon pơlei pơla”, atŭm jơhngơ̆m tơgŭm Têt ăn kon pơlei tơ̆ tơring sơlam.