Truh dang ei, dêh char Lâm Đồng hlôi pơjing 124 hơnih pôk rơih tơring ƀlep kiơ̆ khôi luơ̆t tơchơ̆t; adoi pơjing 6 Hơnih pôk rơih kơdră tang măt Kuô̆k hô̆i păng 38 Hơnih pôk rơ̆ih kơdră tang măt Jơnŭm vei lăng kon pơlei dêh char. Lơ̆m dêh char klăh asong jing 6 hơnih pôk rơih kơdră tang măt Kuô̆k hô̆i, gô pôk rơih 17 ‘nu kơdră tang măt; 38 hơnih pôk rơih Jơnŭm vei lăng kon pơlei dêh char, pôk rơih 85 ‘nu kơdră tang măt. Dêh char hlôi pơjing 1.004 hơnih pôk rơih kơdră tang măt Jơnŭm vei lăng kon pơlei tơring, vă pôk rơih 2.949 ‘nu bơngai tang măt. Iung pơma pơtôch jơ bơ̆ jang, Kơ iĕng Kơdră chĕp pơgơ̆r Jơnŭm Pôk rơih Teh đak Võ Thị Ánh Xuân athei dêh char atok kơtang chĕp pơgơ̆r, pơrô̆ jang, lăng bơ̆ jang pôk rơih ji tơdrong jang chinh trĭ gĭt kăl hloh, ưh kơ gơh hơnih ayơ jang hiơ hiơ̆, lon dăh mă ưh kơ keh đang; adoi iung jang kơtang tơdrong dăr lăng tơdrong ‘lơ̆ng ƀlep tơchơ̆t, dôm tơdrong rơvơn kơ bơngai chih hơnăn ăn pôk rơih, sơđơ̆ng ƀlep proh hơmet, ƀlep tơdrong tơchơ̆t.