Kơ iĕng Thủ tướng Teh đak Nguyễn Hoà Bình hlôi năm dăr lăng hơnih vă tơmơ̆t jên jang hơmet ming gre păr tơ̆ Cham gre păr apŭng plĕnh teh Vân Đồn (apŭng Vân Đồn, dêh char Quảng Ninh). Kơ iĕng Thủ tướng athei rim Hơnih tơm, hơnih jang, Hơnih vei lăng kon pơlei dêh char Quảng Ninh iung jang hơdoi kơjăp hăm hơnih tơmơ̆t jên jang vă sơđơ̆ng iung jang, đơ̆ng noh hơvơn đei lơ bơngai tơmơ̆t jên jang teh đak đe vang iung jang vei lăng năng tông, hơmet ming gre păr tơ̆ Cham Gre păr Apŭng plĕnh teh Vân Đồn. Kiơ̆ đơ̆ng rŏng ‘noh, khul bơ̆ jang năm dăr lăng mĭnh ƀar tơdrong vă jang anai, nhen Tơdrong vă jang tơmơ̆t jên jang ming man hơnih tơmang pơhiơ̆, pơdơ̆h pơdei, pơchơt pơhiơ̆ ( pơ đĭ hơnih pơm ƀĕng kơƀŏng casino, hơnih jang tĕch răt teh, hơnih jang hnam tep pơdơ̆h tih, resort... ) tơ̆ tơring Vạn Yên, apŭng Vân Đồn kơ yuơ grŭp jang Sun Group pơm tơngla tơmơ̆t jên jang. Lăp đơ̆ng rŏng mơ̆ng tơroi tơbăt tơdrong tơhlăk tơhlĭn adoi nhen nơ̆r apĭnh athei đơ̆ng păh Hơnih tơmơ̆t jên jang atŭm hăm hơnih vei lăng kon pơlei dêh char Quảng Ninh, Kơ iĕng Thủ tướng Nguyễn Hòa Bình pơjao ăn rim Hơnih tơm, hơnih jang chih akŏm, tơroi tơbăt, apĭnh khul kơdră teh đak hrôih đei trong jang hơmet pơ ‘lơ̆ng lơ̆m khei ‘năr hrôih hloh.