Lơ̆m tơdrong kŭp yom grasia, ah hơnăp Anih soi ƀlŏk Núi Nhạn, Kơdră Anih jang Nô̆i chĭn Trung ương Phan Đình Trạc atŭm hăm Khul kơpal, đe kơdră dêh char Phú Yên kŭp yom ƀlŏk tơbăt kơ đe linh lôch tang hlôi nuih mơng kơyuơ tơdrong tơblah pơrơngei tôm kon pơlei, rơngei teh đak. Kơdră Anih jang Nô̆i chĭn Trung ương Phan Đình Trạc atŭm hăm rim bơngai tang măt hlôi plang pơkao, plang nhang tơ̆ Anih soi ƀlŏk Núi Nhạn. 

Lơ̆m hnam soi ƀlŏk đei 38 kơƀang chih hơnăn 13.085 linh lôch tang ăn teh đak tơ̆ Phú Yên păng 4 kơƀang chih hơnăn 1.000 linh lôch tang tơ̆ minh ƀar dêh char lơ̆m jơ̆p teh đak. Đunh kơ ou 50 sơnăm, hăm tơdrong pơgơ̆r đơ̆ng Đảng, kon pơlei dêh char Phú Yên hlôi tơguăt dih băl nuih mơng iung tơblah vă tơpuh hŭt ayăt Mi tơgar, đei iŏk jơnei dêh char Phú Yên păng pơkăp truh tơdrong tơblah đei jơnei tơring pơbah, rơngei teh đak.