Pơma tơ̆ jơ bơ̆ jang, Phŏ Kơdră Quốc hội Nguyễn Đức Hải athei dêh char Lâm Đồng ‘moi kiơ̆ dôm tơdrong pơtho đơ̆ng Trung ương, jang kiơ̆ hrơ̆ch ‘lơ̆ng, rim tơdrong păng đei yoa tơ̆ yăn âu, lăp hăm rim tơring. Lê̆ kơ rơ rok băl, jing tơlĕch trong lei lăi, ưh đei rơđăh rơđong, hơnat vă gơ̆h bơ̆ jang đei.

Atŭm hăm ‘nŏh, athei hơtŏk đon tơnăp, mă loi hăm bơngai chĕp kơ̆l pơgơ̆r bơ̆ jang, hơlen năng tơdrong jang, pơm ‘lơ̆ng, rơđăh rơđong, đei yoa păng gơ̆h jang kiơ̆. Ưh gơ̆h iŏk pơgâm, pơm tơhiong jên hu, pơhuach kư̆ kă. Hăm Anih tơchĕng hơlen hat nhân, Phŏ Kơdră Quốc hội Nguyễn Đức Hải athei hơlen năng rim trong jang, tơdrong vă jang tŏk đơ̆ng anih găh tơchĕng hơlen hat nhân vă tơlĕch trong tơchĕng hơlen, tơmât yoa ăn tơdrong jang tŏk kơ teh đak lơ̆m chăl ‘nao.