Tơdrong jang đei kŏng suơ̆t 1.900m3 1 năr 1 măng, pơyua ăn dang 2.900 ŭnh hnam kon pơlei, yua đơ̆ng Khŭl kơdră teh đak Hàn Quốc tơgŭm, bơ̆jang tơ̆ thị xã Buôn Hồ, dêh char Đắk Lắk. Kiơ̆ tơdrong lơ̆m hla ar ƀiên ƀan kĭ pơkăp, Khŭl kơdră teh đak Hàn Quốc gô tơgŭm ưh kơ đei pơdrŏu iŏk dơ̆ng ‘noh 9,2 triệu USD păng Khŭl kơdră teh đak Việt Nam iŏk hơdrol 760 rơbâu USD vă bơ̆jang tơdrong pơchoh tơlĕch đak păng hơmet ‘lơ̆ng đak ‘mê̆ ‘mach anih kơdrơ̆m tơ̆ thị xã Buôn Hồ, dêh char Đắk Lắk.

Ƀok Nguyễn Thiên Văn, Phŏ Kơdră Anih vei lăng kon pơlei dêh char Đắk Lắk roi tơbăt, Tơdrong jang hlôi đei KOICA hơlen lăng păng đei Khŭl kơdră teh đak Hàn Quốc kĭ ăn đơ̆ng sơnăm 2024. Dôm hla ar hơlen lăng, pơjing trong tơlĕch jang đei tơlĕch tôch hơlen đơ̆ng blŭng sơnăm ‘nâu hlôi tơgŭm 2 păh năm truh drơ̆ng nơ̆r trong jang hơdai, vei sơđơ̆ng iŏk yua jên ƀlep tơdrong, đei yua, pơm lăp hăm ‘meh vă hơtŏk tơiung kơjăp kơ tơring.