Tơ̆ jơ sơng, Thủ tướng Phạm Minh Chính pơma hơdăh Việt Nam ling lang năng kăl tơdrong pơvei ‘lơ̆ng hơiă đơ̆ng sơ̆ păng jang hơdoi lơ tơdrong hăm Belarus, atŭm hăm ‘nŏh lăp đon hăm dôm tơdrong tŏk pran ‘lơ̆ng lơ̆m tơdrong pơvei Việt Nam - Belarus khei ‘năr âu ki, mă loi găh chinh trĭ – jang tơbôl.

Vă iŏk yoa đĭ rim tơdrong pran ‘lơ̆ng đơ̆ng 2 teh đak, Thủ tướng Phạm Minh Chính athei 2 păh hơnơ̆ng hơtŏk tơdrong ăn khul tơƀâp, pơma nuh, mă loi jĭ khul jang tih, vang jang hơdoi tơ̆ dôm khul lơ pang; athei 2 păh adrin pơm hơtŏk tơdrong pơvei găh mŭk drăm – tĕch mơdro 2 pang dang ei oei tŏk tam mă pran pơting hăm dôm tơdrong ‘lơ̆ng hlôi đei, pơjing tơdrong hiôk hian vă anih tĕch mơdro 2 păh hơtŏk tơdrong jang hơdoi găh tơmât jên jang; vei lăng ‘lơ̆ng dôm tơdrong đei yoa đơ̆ng Anih jang hơdoi kơ 2 Khul kơdră teh đak păng pơjing trong jang mă hơdăh, đei trong jang mă lăp păng đei yoa ƀiơ̆.