Khul kơdră chĕp kơ̆l Trung ương Đảng Cộng sản Việt Nam, Quốc hội teh đak Cộng hòa xã hội Chủ nghĩa Việt Nam, Kơdră teh đak Cộng hòa xã hội chủ nghĩa Việt Nam, Khul kơdră teh đak Cộng hòa xã hội Chủ nghĩa Việt Nam, Anih Trung ương Mặt trận Tổ quốc Việt Nam tơroi: Ƀok Khamtay Siphandone; rơnĕh ‘năr 08/02/1924; sơ̆ pơm Kơdră vei lăng Khul kơdră chĕh kơ̆l Trung ương Đảng Kon pơlei Kăch mang Lào, sơ̆ pơm Kơdră teh đak, sơ̆ pơm Thủ tướng, Phó Thủ tướng, sơ̆ pơm Kơdră tơm vei lăng khul linh teh đak Cộng hòa Dân chủ Nhân dân Lào lôch hơchăng ƀât 10h30, arih sot 101 sơnăm.

Ƀok Khamtay Siphandone jĭ 1 lơ̆m dôm kơdră chĕp kơ̆l blŭng a lơ̆m tơdrong pơjing trong jang kăch mang Lào. Ƀok kŭm hăm dôm Kơdră chĕp kơ̆l adrol sơ̆ chĕp kơ̆l pơgơ̆r bơ̆jang kăch mang păng iŏk đei jơnei hơnơ̆ng, hơnhăk Kăch mang Lào truh hăm năr tơblăh jơnei đĭ đăng, dar dĕh hơnhăk teh đak Lào yak tŏk kiơ̆ trong Chủ nghĩa xã hội. Ƀok jĭ bơngai buăl juăt tôch ‘lơ̆ng hăm Đảng, Teh đak păng kon pơlei Việt Nam, hơnơ̆ng tơrek truh păng đei lơ kŏng tih tên, tơgop gĭt kăl ăn tơdrong tơiung pơjing, hơmet kơjăp păng tưk tơiung tơdrong pơvei ‘lơ̆ng hơiă, tôch gĭt kăl, jang hơdoi tôm tơdrong Việt Nam-Lào lơ̆m prăt khei ‘năr âu ki. Ƀok lôch hơchăng jĭ 1 tơdrong hiong răm tih hăm teh đak Lào păng tơdrong pơvei Việt Nam-Lào.

Vă tơƀôh jơhngâm đon ‘mêm kơ eng kơ ƀok Khamtay Siphandone păng đei đơ̆ng tơdrong pơvei gĭt kăl Việt Nam - Lào, Khul kơdră chĕp kơ̆l Trung ương Đảng Cộng sản Việt Nam, Quốc hội teh đak Cộng hòa xã hội Chủ nghĩa Việt Nam, Kơdră teh đak Cộng hòa xã hội chủ nghĩa Việt Nam, Khul kơdră teh đak Cộng hòa xã hội Chủ nghĩa Việt Nam păng Anih Trung ương Mặt trận Tổ quốc Việt Nam tơchơ̆t pơdong ăn ƀok Khamtay Siphandone kiơ̆ trong pơgơ̆r pơdong jơ̆p lơ̆m teh đak lơ̆m 2 năr, đơ̆ng ‘năr 04 - 05/4/2025.

Lơ̆m năr pơdong, rim anih jang kơ teh đak lơ̆m teh đak păng dôm anih jang tang măt ăn Việt Nam tơ̆ teh đak đe hơtol hla kơ sơ ‘ngon, văn che pơdong nhen tơdrong hơgăt; ưh đei pơgơ̆r rim tơdrong ngôi pơchơt lơ̆m tơpôl.