Tang măt ăn kơ Đảng, Teh đak păng kon pơlei Việt Nam, Tổng Bí thư Tô Lâm tơƀôh tơdrong ol sơ-'ngon hăm tơdrong mă ƀok Khamtay Siphandone lôch hơchăng, păng pơtruh nơ̆r hăm đe Kơdră kơpal kơ teh đak Lào, tôm kon pơlei Lào păng unh hnam 'nhŏng oh ƀok Khamtay Siphandone nơ̆r vang ol sơ-'ngon kăp gĭt hloh. Ƀok Tổng Bí thư Tô Lâm ră hơdah, ƀok Khamtay Siphandone ưh hơdrô̆ jĭ Kơdră gơh hơgei lơ̆m jơhnơr mă blŭng tơ-iung pơjing kăch mang Lào, pơgơ̆r tơdrong jang kăch mang rơngei hiôk hian hơdrol ki păng tơdrong vei lăng păng hơtŏk teh đak, Kơdră yuk hơlou lơ̆m tơdrong pơm kiơ̆ pơkăp tơplih 'nao tôm tơdrong kơ Đảng Kon pơlei kăch mang Lào mă oei jĭ buăl juăt tơguăt kơjăp, hơnơ̆ng atŭm hăm Việt Nam lơ̆m jăl trong iung tơjră vă vei lăng sơđơ̆ng kơ 2 hơdrung hơdrĕch.

Tơdrong mă Ƀok Khamtay Siphandone lôch jĭ minh tơdrong hiong răm hăm Đảng, Jơnŭm pơgơ̆r păng kon pơlei 2 teh đak Lào păng Việt Nam. Vă pôk bơnê hăm tơdrong tơgop đơ̆ng ƀok Khamtay Siphandone ăn tơdrong hơtŏk jang tơbôl tơguăt kơjăp Việt Nam - Lào, Đảng, teh đak Việt Nam tơchơ̆t pơgơ̆r kơ-ŭ tơnuh lơ̆m jơ̆p teh đak lơ̆m 2 năr, đơ̆ng năr 4 truh 5/4/2025.