Kiơ̆ tơdrong tơproh hơmet trong yak đơ̆ng 2021 - 2030, trong vă jang truh sơnăm 2050, trong gre kơdâu hrĕnh Quảng Ngãi- Kon Tum kơjung 136 km, xă 4 tŏ gre kơdâu, vă tơmât jên jang adrol kơ sơnăm 2030. Dang ei Khul kơdră pơgơ̆r 2 dêh char Kon Tum păng Quảng Ngãi hlôi hôp păng drơ̆ng nơ̆r athei Anih tơm vei lăng ming man pơm trong gre kơdâu hrĕnh hăm kơsô̆ jên vă jê̆ 35.400 ti, găh grŭp tơdrong jang gĭt kăl kơ teh đak.

Kiơ̆ nơ̆r athei, trong gre kơdâu hrĕnh Quảng Ngãi - Kon Tum năm klĕch 5 tơring đei thĭ xăh Đức Phổ, apŭng Ba Tơ (kơjung 58km găh dêh char Quảng Ngãi) păng 3 apŭng đei Kon Plông, Kon Rẫy păng plt Kon Tum (kơjung 78km găh dêh char Kon Tum). Trong gre kơdâu hrĕnh vă pơm ăn 4 tŏ gre kơdâu hơdai, kơdâu hrĕnh đơ̆ng 80 -100 km/jơ. Tơ̆ trong đei 9 anih tơƀưh, pơm ‘lơ̆ng hăm trong tơm, tơƀưh hăm anih jang mŭk drăm, jŏh ayŏ kơ dŏ xoang, chinh trĭ tôch hiôk hian. ‘Ngoăih kơ ‘nŏh, trong gre kơdâu hrĕnh vă man 60 tŏ gơng kơpal trong, 10 tŏ gơng klĕch đak krong, thong đak păng 3 tŏ trong trôm.

Đơ̆ng nơ̆r athei kơ 2 dêh char, ‘nao  âu, Anih tơm vei lăng ming man tơchơ̆t pơjao ăn Anih vei lăng tơdrong jang 85 pơgơ̆r chih hơlan ar, tơchĕng hơlen tơdrong ‘lơ̆ng mưh Tơmât jên pơm trong gre kơdâu hrĕnh Quảng Ngãi - Kon Tum. Anih vei lăng tơdrong jang 85 kơchăng bơ̆ jang hăm dôm anih jang đei ƀơm truh vă iŏk akŏm rim tơdrong tơchĕng hơlen vă hơnơ̆ng chih hơmet trong tơmât jên jang, huei hơdrom băl, huei huach kư̆ kă.

Ƀok Đàm Phúc Tuyên – Phŏ Kơdră Anih vei lăng ming man dêh char Kon Tum, ăn tơbăt: Tơdrong jang pơm trong gre kơdâu hrĕnh Quảng Ngãi- Kon Tum, hơdrô̆ tơdrong chưk pơ ‘ngoăih teh đei kơjă hlŏh 1.200 ti hlak jên. 2 dêh char pơkăp vă tơlĕch tôm jên vă chưk pơ ‘ngoăih teh, pơjao teh ăn tơdrong jang pơm trong lơ̆m sơnăm 2026. Găh dêh char Kon Tum hơmet dang 650 ti hlak jên ăn tơdrong chưk pơ ‘ngoăih teh. Chih iŏk tơdrong kăl đơ̆ng dôm tơdrong jang nai, dêh char hlôi băt hơdăh dôm tơdrong pơmat tat vă kơchăng tơlĕch trong bơ̆jang chưk pơ ‘ngoăih teh.

Ƀok Đàm Phúc Tuyên tơroi: Tơdrong man trong gre kơdâu hrĕnh Quảng Ngãi - Kon Tum ưh lăp pơm ăn 2 tơring roi jê̆ băl, tưk tơiung tơdrong tĕch mơdro đĕch, mă oei jing jơhngâm pran tih vă Măng Đen tưk tơiung tơdrong chă tơmang lăng. Tơdrong trong gre kơdâu hrĕnh đei tơmât jên jang hrôih, sư pơm ăn Măng Đen jing anih chă tơmang lăng tơ̆ bri brăh tih tơ̆ Tây Nguyên, hơdai hăm ‘nŏh, tơgŭm ăn Kon Tum păng Quảng Ngãi jing anih jang mŭk drăm pran tơ̆ tơring Tŏk bŏk - Tây Nguyên.

Atŭm hăm ‘nŏh, trong gre kơdâu hrĕnh Quảng Ngãi - Kon Tum oei tơgop pơjing đei trong kơjăp ‘lơ̆ng, tơƀưh trong gre kơdâu hrĕnh Đông-Tây hăm trong gre kơdâu hrĕnh Bắc-Nam; tơgŭm pơm tơjur ƀiơ̆ jên chơ chuĕn păng pơtruh tơmam đơ̆ng tơ̆r ‘long, ‘long pơgang, kao su, mắc ca, cheh phe truh hăm tơnŏk đak dơsĭ Dung Quất roi hiôk hian. Mă loi ‘nŏh, trong gre ‘nâu oei pơvih ‘lơ̆ng ăn tơdrong jang tơiung pơjing păng vei lăng teh đak hăm dêh char Quảng Ngãi, Kon Tum păng tơring Tây Nguyên, tơring tơter đak dơsĭ kơ Tơring Tŏk bŏk kŭm nhen tơƀưh hăm tơring Kơlang 3 pang jang tŏk kơ Việt Nam - Lào – Campuchia./.