Hop akŏm pơma akhan, ‘nhot plei ‘long jĭ 1 lơ̆m pêng grŭp tơmam đơ̆ng choh jang sa đei tĕch tơ̆ teh đak đe lơ hloh kơ Việt Nam. Sơnăm 2024, akŏm kơjă tĕch ‘nhot plei ‘long tơ̆ teh đak đe iŏk đei tôch kơ lơ, truh 7,12 ti USD. Mă đơ̆ng đĭ tĕch tơ̆ hloh 80 teh đak păng tơring bơih ră mă lei ‘nhot plei ‘long Việt Nam tŏk bŏk tơjră hăm dôm tơdrong pơgăn ki thuơ̆t roi đunh roi kơhret găh tơdrong pruih pơgang, hơlen lăng pơrang jĭ păng athei jang mă lăp hăm nơ̆r hơgăt mưh bơ̆jang, cham char.

Tơ̆ hop akŏm, dôm bơngai joăt jang, bơngai vei lăng, bơngai mơdro sa... tơroi găh tơdrong oei đei dang ei, dôm tơdrong nol păng dôm trong jang hơtŏk tơiung tĕch ‘nhot plei ‘long Việt Nam tơ̆ teh đak đe; hơnăp jang đơ̆ng jang hơdai đơ̆ng teh đak hăm anih jang kơdih vă hơtŏk ‘lơ̆ng ăn ‘nhot, plei ‘long tĕch tơ̆ teh đak đe; vang tơroi, pơgơ̆r jang kiơ̆ kơmăy kơmŏk lơ̆m pơm tơlĕch ‘nhot, plei ‘long…