Dôm dêh char Đắk Nông, Lâm Đồng hlôi chih đei hla ar tơroi găh tơdrong iŏk nơ̆r tơgop đơ̆ng bơngai tăh hla ƀơm truh tơdrong tơmât hơdai dêh char. Kiơ̆ Tơdrong tơchơ̆t kơsô̆ 759 ‘năr 14/4 đơ̆ng Thủ tướng teh đak, dêh char Lâm Đồng vă tơmât hơdai hăm dêh char Đắk Nông păng Bình Thuận, iŏk hơnăn ‘nŏh dêh char Lâm Đồng; anih jangtơm pơm tơ̆ Đà Lạt. Dêh char Lâm Đồng ‘nao, đơ̆ng rŏng kơ tơmât hơdai đei teh xă truh 24.233km2 – jing dêh char xă hlŏh kơ̆m teh đak, kơsô̆ kon pơlei đei 3.324.400 ‘nu bơngai.

‘Năr 22/4, Anih jang Nô̆i vŭ dêh char Lâm Đồng hlôi roi tơbăt tơdrong iŏk nơ̆r tơgop đơ̆ng kon pơlei, bơngai dơ̆ng tang ăn rim unh hnam găh hơmet ming anih vei lăng tơ̆ dêh char păng tơ̆ xăh. Kiơ̆ kơ ‘nŏh, Khul kơdră tơring pơgơ̆r iŏk nơ̆r tơgop đơ̆ng hlŏh 320.000 ‘nu bơngai tăh hla tơ̆ tơring. Mă hơtuch, đei hlŏh 97,8% bơngai tăh hla dơ̆ng tang ăn unh hnam drơ̆ng nơ̆r hăm tơdrong tơmât hơdai 3 dêh char Lâm Đồng, Bình Thuận, Đắk Nông. Kơsô̆ bơngai tăh hla drơ̆ng nơ̆r tơgŭm ăn tơdrong tơmât hơdai anih vei lăng tơ̆ xăh đei hlŏh 97,3%.

Kiơ̆ tơroi đơ̆ng dêh char Đak Nông, đei hloh 97,2% kon pơlei tah hla lơ̆m dêh char drơ̆ng nơ̆r pơm kiơ̆ pơkăp tơmơ̆t hơdai hăm dêh char Bình Thuận, păng Lâm Đồng. Hơdrol kơ noh, dôm tơring tơ̆ Đak Nông hlôi iŏk nơ̆r tơgop asong kơphĭu tơ̆ jê̆ 150.000 unh hnam, pơm trong hiôk hloh ăn kon pơlei tah hla tơƀôh đon tơchĕng kơdih po. Jê̆ tôm kon pơlei drơ̆ng nơ̆r hăm tơdrong tơmơ̆t hơdai dêh char Đak Nông - Bình Thuận - Lâm Đồng. Kơsô̆ bơngai tah hla drơ̆ng nơ̆r tơmơ̆t hơdai tơ̆ xah noh hloh 97%. Tơchĕng lăng dêh char Đak Nông gô pơkăp tơjur đơ̆ng 71 anih jang hanh chĭn tơ̆ xah, jur oei pă 28 xah.