Dôm năr hơtuch khei 3, tơ̆ trong gre kơdâu hrĕnh Khánh Hòa - Buôn Ma Thuột, jăl kơdâu klĕch tơƀôt bri 1148, găh bri ‘long plei Ea Rớt, xăh Cư Pui, apŭng Krông Bông, hlŏh 30 ‘nu công nhân kŭm hăm dôm jĭt tŏ gre, kơmăy kơmŏk tih đơ̆ng Công ty Jang hơdoi Grŭp jang Đạt Phương oei hăt bơ̆ jang. ‘Nhŏng Vũ Đức Hùng, kăn ƀô̆ vei lăng ki thuơ̆t kơ công ty tơroi: ‘Nâu jĭ tơdrong jang XL03 găh Tơdrong jang 2, hăm 14km trong pơm klĕch bri truh ƀât ‘măng trong trôm Phượng Hoàng. Mă lei, truh hơtuch jăl khei mă III sơnăm sơ̆, công ty ‘nao pơjao tĕh pơm trong, pơm ăn tơdrong jang hiơ̆ dang 30%: “Công ty oei pơm 2 păh ‘măng trong trôm găh Pơmât păng Hơlĕch. ‘Măng găh Pơmât bơ̆jang đơ̆ng khei 9/2024, mă lơ ‘nŏh man gơng păng kuer trôm; ‘măng păih Hơlĕch bơ̆jang đơ̆ng khei 2/2025 păng tam mă jang đei lơ, tơdrong jang mă lơ ‘nŏh chă sir kôch, ƀŭ hơmet teh mă tơhnă. Dang ei oei tơhlăk hlŏh 3 héc-ta teh bri tam mă pơm hla ar tơplih ming trong iŏk yoa teh. Nhôn hơpơi ‘mĕh jăh pơm đang hla ar vă gơ̆h bơ̆ jang hiôk hian”.

Tơdrong jang 2 đei jên jang hlŏh 10.436 ti, pơm trong kơjung vă jê̆ 40 km, anih blŭng a ‘nŏh đơ̆ng thĭ xăh Ninh Hòa, dêh char Khánh Hòa, klĕch dôm apŭng M’Đrắk, Krông Bông păng Ea Kar kơ dêh char Đắk Lắk. ‘Nâu jĭ tơdrong jang đei jên jang lơ hlŏh, yoa Anih vei lăng Tơdrong jang 6 – Anih tơm vei lăng ming man pơm tơ ‘ngla tơmât jên jang. Mă lei, tơdrong ming man tơ̆ âu oei tôch hiơ̆ ‘nao lăp đơ̆ng 12% - 27% đech, mơ̆ng kiơ̆ rim tơdrong iŏk jang.

Ƀok Nguyễn Thanh Tú, Phŏ Kơdră Anih pơgơ̆r jang hơdoi kơ Grŭp jang Đèo Cả, ăn tơbăt Anih pơgơ̆r jang hơdoi oei jang tơdrong jang XL01, kơjung 11km, đei hloi trong trôm Phượng Hoàng kơjung 1,7km, 10 tŏ gơng kơloăi 1 păng 5,6km trong... akŏm đĭ đăng jên jang 3.083 ti. Lơ̆m kơsô̆ 4 tŏ ‘măng trong trôm athei ming man, ‘măng păih ‘ngieu geh Khánh Hòa oei tam mă pơih yoa tơhlăk 1,9 héc-ta teh bri tam mă pơm hla ar tơplih ming. ‘Ngoăih kơ ‘nŏh, păih ta-luy kông găh ‘ma trong tôm geh Pơmât dêh char Đắk Lắk oei tơhlăk yoa ƀơm teh choh jang xa kơ 1 unh hnam kon pơlei ‘năi.

“Găh dêh char Đắk Lắk, dang ei lơ̆m teh xă hlŏh 6.000 m² tam mă đei kĭ ăn trong iŏk pơdreu teh păng trong vă hrŭ ‘mong ăn kon pơlei. Đe sư athei anih iŏk jang pơdơ̆h jang ƀât teh âu ‘mơ̆i. Găh dêh char Khánh Hòa, nhôn ‘nao pơih đei ‘măng trong trôm găh ‘ma lơ̆m ‘năr 15/3 âu ki; oei găh ‘ngieu oei gô đei trong hrŭ ‘mong tơmam mă hơtuch ‘mơ̆i, kla đang jên teh ‘nŏh gơ̆h pơjao teh vă pơm trong, đang kơ ‘nŏh ăn kơmăy kơmŏk truh bơ̆ jang”.

Lơ̆m 3 tơdrong jang pơm trong gre kơdâu hrĕnh Khánh Hòa - Buôn Ma Thuột, tơdrong jang năm klĕch dêh char Đắk Lắk bơ̆ jang ‘lơ̆ng hlŏh mă lei kŭm tơƀâp lơ tơdrong tơhlăk găh teh, tơmam vă man, anih sir kôch iŏk teh vă ƀŭ tơ̆ trong, pơm trong yak ăn kon pơlei păng tơdrong tuh hŭt teh rơkăh ‘năi.

Ƀok Nguyễn Thiên Văn, Phŏ Kơdră vei lăng kon pơlei dêh char Đắk Lắk, ăn tơbăt, dêh char oei pơtho bơ̆jang tôch pran vă sek tơlang dôm tơdrong tơhlăk ƀơm truh anih sir iŏk teh vă ƀŭ tơ̆ trong, tơmo vă man păng tơlei điên; athei apŭng, xăh jăh pơma nuh, pơlung unh hnam kon pơlei vă jăh pơjao teh pơm trong:

“Nhôn hlôi pơtho ăn Anih vei lăng tơdrong jang, anih iŏk jang, Anih vei lăng kon pơlei apŭng Krông Pach păng dôm Anih jang kơpal hơtŏk hrĕnh tơdrong pơm hla ar asong kôch iŏk teh ƀŭ trong ăn anih ming man. Găh ưh kơmăh tơmo, dêh char drơ̆ng nơ̆r hăm Anih vei lăng pơm trong kơ dêh char Đắk Lắk păng dôm anih iŏk jang, kŭm hăm Anih vei lăng Tơdrong jang 6, chơ iŏk tơmo đơ̆ng tơdrong jang 2 ăn tơdrong jang 3 vă hơtŏk hrĕnh tơdrong jang ming man. Găh tơlei unh điên ăn kon pơlei, Anih vei lăng kon pơlei apŭng pơtho ăn dôm xăh tơlĕch jang mă hrĕnh, vă tơgŭm ăn kon pơlei hai, pơjing tơdrong ‘lơ̆ng ăn anih iŏk jang ming man hai”.

Truh dang ei, tơdrong jang 1 yoa dêh char Khánh Hòa pơm tơ ‘ngla tơmât jên jang hlôi pơjao vă jê̆ 93% teh pơm trong, mă lei tơdrong jang ming man ‘nao đei lăp 49%, hiơ̆ ƀiơ̆ 8,3% pơting hăm nơ̆r hơgăt. Tơdrong jang dang ei oei tơhlăk ƀât 15 anih kơchĭl ƀơm truh tơdrong chưk pơ ‘ngoăih teh; tơdrong pơm hơmet jrăng, dăng hơmet tơlei unh điên, tơlei kap, unh điên tơ̆k hơdăh… oei tơƀâp pơmat tat ‘năi.

Ƀok Đinh Văn Thiệu, Phŏ Kơdră vei lăng kon pơlei dêh char Khánh Hòa, pơm tơƀôh dôm tơdrong tơhlăk kăl hơmet pơ ‘lơ̆ng ăn tơdrong jang: “Lơ̆m kơsô̆ 42 tơdrong, đei 18 tơdrong athei pơjing ming anih oei xa ‘nao. Dang ei teh vă pơjing anih oei xa plơ̆ng hlôi đei dêh char Khánh Hòa pơm đang, gơ̆h ăn tôm bơngai, unh hnam tŏk oei dơ̆ng. Hơdrô̆ hăm 24 unh hnam ưh đei hơmet ăn anih oei xa ‘nao, dêh char vă sek tơlang kĕh hrôih hlŏh. Tơdăh dôm unh hnam ưh chu pơm kiơ̆ trong hrŭ ‘mong, pơjao teh ‘nŏh vă pơgơ̆r yuih hut hnam, chưk pơ ‘ngoăih teh kiơ̆ tơdrong hơgăt đơ̆ng luơ̆t, yoa ưh đei trong jang yơ pha.”

Truh dang ei, tơdrong jang pơm trong gre kơdâu hrĕnh Khánh Hòa - Buôn Ma Thuột tơlĕch jang đei vă jê̆ 2 sơnăm bơih, hơtŏ hăm dang 1 puăt khei ‘năr vă bơ̆ jang tơdrong jang ‘nâu. Mă lei, lơ “anih oei chĭl đom” đơ̆ng năr blŭng tơlĕch jang truh dang ei oei đei đĕch. ‘Nâu jĭ tơdrong găn trong tih hăm đon adrin khŏm jang đang ƀât hơtuch sơnăm 2026 păng tơmât yoa ƀât blŭng sơnăm 2027 mă Thủ tướng teh đak hlôi tơlĕch./.