Ia Pết jĭ xăh pơmat tat dêh hlŏh tơ̆ dêh char Gia Lai. Xăh đei hlŏh 1.800 unh hnam hăm vă jê̆ 9.200 ‘nu bơngai, lơ̆m noh mă lơ ‘nŏh jĭ bơngai Jarai păng Băhnar. Vă tơgŭm ăn kon pơlei jang xa, xăh Ia Pết ƀơk ăn 1 unh hnam tơnuh, unh hnam vă jê̆ tơnuh 1 pôm rơmo yŏng. Rơmo yŏng răt iŏk kơtă tơ̆ tơring păng mă lơ ‘nŏh jĭ rơmo yŏng lai.

Mưh tơlĕch jang, xăh pơgơ̆r hôp pơlei, chă rơih dôm unh hnam kalw đei tơgŭm tơpă vă pơjao ăn rơmo. Đơ̆ng rŏng đei măt dôm unh hnam đei xa yoa, xăh thuê gre chơ rơmo năm truh tơ̆ hnam kon pơlei mơ̆ng kon pơlei chă rơih vă iŏk rong. Ƀok Lữ Quốc Tuấn, Kơdră vei lăng kon pơlei xăh Ia Pết, tơroi hơdăh hlŏh dơ̆ng: “Jên teh đak tơgŭm răt 1 pôm rơmo yŏng đơ̆ng 14 - 15 triu. ‘Ngoăih kơ jên teh đak tơgŭm, mih ma duch nă chă tơgop thim vă răt đei rơmo yŏng tih ƀiơ̆. Jên tơgŭm răt rơmo kiơ̆ tơdrong jang, pơtih gia rơmo trăp đơ̆ng 120kg, mă lei lơ bơngai rơih rơmo trăp hlŏh 160 kg 1 pôm. Đe sư tơgop thim jên kơdih đơ̆ng 1 - 3 triu hlak jên 1 pôm. Truh dang ei, đei 109 unh hnam đei tơgŭm rơmo yŏng đơ̆ng tơdrong jang.”

Đơ̆ng rŏng hlŏh 3 sơnăm tơlĕch jang, lơ unh hnam tơnuh đei xa yoa đơ̆ng tơdrong tơgŭm ‘nâu, tơdrong rong rơmo roi đunh roi ‘lơ̆ng. ‘Nhŏng Rmah Thim, bơngai Jarai, tơ̆ plei Al phun, xăh Ia Pết, tơroi: “Vă sut pơđĭ pơngot, tơjur tơnuh, Teh đak tơgŭm ăn kon pơlei rong rơmo. Lơ̆m pơlei đei lơ bơngai rong rơmo yŏng. Hnam nhôn rong 1 pôm rơmo yŏng. Rơmo su 1 sơnăm 1 pôm kon bơih.”

Kŭm hăm tơdrong tơgŭm rơmo yŏng ăn kon pơlei, khul kơdră pơgơ̆r tơring oei pơtho ki thuơ̆t rong păng tang găn jĭ tơ̆ kon tơrong ăn lơ unh hnam iŏk rong. ‘Nhŏng Lê Minh Thu, kăn ƀô̆ vei lăng teh choh jang xa xăh Ia Pết, tơroi: “Lơ̆m khei ‘năr tơlĕch tơdrong jang, xăh krao kon pơlei truh, pơma nuh tơlĕch trong jang mơ̆ng kon pơlei rơih kơdih. Đơ̆ng rŏng kơ ‘nŏh kĭ ăn, xăh pơtho ăn mih ma duch nă pơm hơdrong rơmo, roi tơƀôh ki thuơ̆t rong, jang hơdoi hăm anih jang kơpal pơih lăm pơtho ăn kon pơlei ki thuơ̆t rong rơmo. Đơ̆ng tơlĕch tơdrong jang, truh dang ei đĭ đei 1,2 unh hnam klăih đơ̆ng tơnuh bơih.”

Hăm tơdrong tơgŭm tôch pơneh đơ̆ng khul kơdră tơring, kon pơlei hlôh vao trong rong, hiĕm rơmo. Yoa thoi noh, lơ rơmo bek ‘lơ̆ng, ƀônh tih păng su kon. ‘Nhŏng Nek, tơ̆ xăh Ia Pết, chơt hơiă tơroi: “Hnam nhôn rong 1 pôm rơmo dang ei rơmo yŏng đĭ su bơih. Tơdrong arih xa kơ unh hnam đĭ klăih đơ̆ng tơnuh hin bơih, inh hơiă dêh. Inh vă adrin jang xa, khŏm jang tŏk, hơmet pơ ‘lơ̆ng tơdrong arih, hơtŏk iŏk yoa.”

Mĭnh ‘nu bơngai nai tơ̆ plei Alphun, xăh Ia Pết, tơroi dơ̆ng: “Hnam nhôn ưh đei mir roh, ưh đei teh, dang ei đei teh đak tơgŭm man hnam, asong rơmo yŏng vă rong. Inh bơnê kơ Đảng păng Teh đak lơ dêh.”

Tơdrong jang rong rơmo yŏng tơ̆ xăh Ia Pết vang tơgop tơgŭm ăn lơ unh hnam tŏk klăih đơ̆ng tơnuh hin. Hrei ‘nâu tơring oei hơnơ̆ng tưk tơiung tơdrong jang ‘nâu vă gơ̆h đei dơ̆ng lơ unh hnam kon pơlei đei tơgŭm, jang tŏk mŭk drăm, pơjing tơdrong arih xa roi đunh roi phĭ tơtŏ, dơnŏ ‘lơ̆ng./.