Tang măt Trung ương Đảng, Tổng Bí thư roi tơbăt 1,2 trong jang gĭt kăl vă jang đei ‘lơ̆ng hlŏh đon pơhnŏng “Tơpôl sơđơ̆ng ‘lơ̆ng, jang tŏk mŭk drăm, pơm hơtŏk tơdrong arih xa ăn kon pơlei”, truh sơnăm 2030, teh đak bơ̆n jing teh đak đei ƀôh, jang hăm kơmăy kơmŏk ‘nao, truh sơnăm 2045 jing teh đak pơdrŏng, đei iŏk yoa lơ. Tổng Bí thư pơma hơdăh, Đảng păng teh đak akŏm tôch ai ăn dôm trong jang vă vei lăng ‘lơ̆ng tơdrong rơngei, sơđơ̆ng, hiôk hian vă jang tŏk teh đak. Đảng bơ̆n ưh đei tơdrong đei yoa yơ pha ‘ngoăih kơ tơdrong đei yoa ăn kon pơlei; kon pơlei jĭ tơm dơnơm, jĭ tơ ngla lơ̆m rim tơdrong jang, trong jang đơ̆ng Đảng; rim tơdrong adrin đơ̆ng Đảng, Teh đak, rim anih jang chinh trĭ lăp đei yoa mưh kon pơlei đei tơdrong arih xa phĭ tơtŏ dơnŏ ‘lơ̆ng, hiôk chơt đĕch.

Kơlih thoi noh, Đảng, Teh đak vă akŏm lơ trong jang vei lăng năng tông, pơm hơtŏk tơdrong arih xa ăn kon pơlei, mă loi jĭ kon pơlei kon kông tơ̆ tơring hơtăih yăih, tơring sơlam teh đak, achon kông, tơring kăn kư̆ chăl iung tơblăh sơ̆, dôm tơring gĭt kăl, tơring đei lơ kon pơlei kon kông păng tơdrong lui khop. Bơ̆ jang ‘lơ̆ng tơdrong vei lăng tơdrong arih xa tơpôl, pơyoa ăn tơpôl, đei trong tơgŭm mă lăp hăm bơngai đei kŏng; pơm kiơ̆ trong ưh đei thu jên hŏk hăm rim jăl hok phô thŏng; khŏm jang kĕh đang tơdrong sut pơđĭ hnam hiăh hiok lơ̆m teh đak; năng kăl truh tơdrong atŏk tơiung tơdrong jang pơgang, vei lăng jơhngâm pran ăn kon pơlei, năm truh tơdrong ưh đei iŏk jên hơmet jĭ hăm đĭ đăng kon pơlei, vă rim bơngai Việt Nam gơ̆h đei tơdrong arih xa phĭ tơtŏ dơnŏ ‘lơ̆ng, hiôk chơt ngăl./.