Gơmăng năr 6/8, Kơdră chĕp pơgơ̆r Teh đak Lương Cường păng Hơkăn ƀok atŭm hăm Khul kơdră kơpal Việt Nam hlôi năm truh tơ̆ Hơnih tơm Lu-an-đa (Luanda), iung năm tơmang teh đak Cộng hoà Angola kiơ̆ nơ̆r krao hơvơn đơ̆ng Ƀok Kơdră tơm Giao Ma-nu-ên Gôn-xan-vét Lâu-ren-xô (João Manuel Gonçalves Lourenço) hăm hơkăn ƀok. ‘Nou ‘măng năm tơmang kơdră kơpal hloh kơ Việt Nam jô̆ đơ̆ng sơnăm 2008. ‘Măng năm tơmang đơ̆ng Kơdră chĕp pơgơ̆r Teh đak Lương Cường đei pơgơ̆r ƀlep lơ̆m jơ ‘năr ƀar teh đak tơbăt 50 sơnăm pơjing tơbôl. Lơ̆m jơ ‘năr tơmang đơ̆ng năr 6 truh năr 8/8, Kơdră chĕp pơgơ̆r Teh đak Lương Cường gô đei pơma đam Kơdră kơpal hăm Ƀok kơdră tơm João Manuel Gonçalves Lourenço; pơma dơnuh hăm Kơdră chĕp pơgơ̆r Kuô̆k hô̆i Carolina Cerqueira; bơ̆ jang hăm Kơdră chĕp pơgơ̆r Đảng Khul kon pơlei pơm rơngei Angola; tơƀơ̆p pơma dơnuh hăm kon pơlei Việt Nam tơ̆ Angola păng vang Pơm lêh tơbăt 50 sơnăm pơjing tơbôl ƀar teh đak. Mă kăl, Kơdră chĕp pơgơ̆r teh đak gô đei nơ̆r pơma gĭt kăl tơ̆ Kuô̆k hô̆i Angola, đơ̆ng ou tơbăt hơdăh trong bơ̆ jang đơ̆ng Việt Nam ‘meh vă tơgop tih tên lơ̆m tơdrong jang chinh trĭ apŭng plĕnh teh, mŭk drăm lơ̆m plei teh păng tơdrong gơh hơgei kơ kon bơngai.