Lơ̆m ‘măng iung năm tơmang teh đak Ai Cập, pơgê năr 4/8 (kiơ̆ jơ tơring), Kơdră chĕp pơgơ̆r Teh đak Lương Cường hăm Khul Kơdră kơpal Việt Nam hlôi năm ngôi păng iung pơma tơ̆ Hơnih bơ̆ jang Jơnŭm atŭm Arab tơ̆ hơnih tơm Cairo hăm hơnăn “Pơih đei mĭnh trong ‘nao lơ̆m tơgoăt tơgoăl păng jang hơdoi ƀar păh Việt Nam hăm rim teh đak Ả-rập kơ yuơ rơngei hiôk hian, jang hơdoi păng atŏk tơ iung”. Jơnŭm atŭm Arab ‘noh khul kơ rim teh đak Arab lơ̆m tơring châu Phi păng achon Arab, đei pơjing đơ̆ng sơnăm 1945. Hrei ou, Jơnŭm atŭm Arab đei 22 teh đak. Khei 7/2023, Việt Nam hăm Jơnŭm atŭm Arab hlôi pơjing trong tơchơ̆t jang hơdoi. Iung pơma tơ̆ ou, Kơdră chĕp pơgơ̆r teh đak Lương Cường pơma hơdăh: Việt Nam ‘meh vă atŭm chih đei mĭnh trong ‘nao ăn tơgoăt tơgoăl jang hơdoi lơ tơdrong ƀar păh Việt Nam hăm rim teh đak Arab kơ yuơ rơngei hiôk hian, jang hơdoi păng atŏk tơ iung. Hơlen dơ̆ng dôm tơdrong iŏk đei tih tên gĭt kăl chăl sơnăm kơ Việt Nam lơ̆m vă jê̆ 40 sơnăm tơplih ‘nao, Kơdră chĕp pơgơ̆r Teh đak jei tơbăt ăn 5 trong jang hơ iă gĭt kăl. Hrei ou Đảng, Teh đak Việt Nam hlôi tơlĕch trong lăng hle, kơrŭn đĭ ai truh sơnăm 2045 ba Việt Nam jing teh đak atok tơ iung, jang sa đei iŏk yua lơ. Kơdră chĕp pơgơ̆r Teh đak sơkơ̆t hơdăh, Việt Nam ling lang yom kiơ̆, vei kơjăp păng hưch hanh hơmanh bơnê mưh đei tơgoăt tơbôl hăm đĭ đăng 22 teh đak lơ̆m Jơnŭm atŭm Arab, hăm lơ tơdrong jang hơdoi roi năr roi ‘lơ̆ng hơ iă păng iŏk đei jơnei. Kơdră chĕp pơgơ̆r teh đak jei athei ƀar păh atŏk kơtang hloh dơ̆ng iung jang hơdoi tơ̆ rim ‘măng hop akŏm lơ pang lơ̆m tơring păng apŭng plĕnh teh, atŭm dih băl pơtrŭt kơtang đei rơngei hiôk hian kơjăp ‘lơ̆ng tơ̆ ƀar tơring, tơgop lơ̆m tơ iung pơjing mĭnh apŭng plĕnh teh ‘lơ̆ng rŏ hloh, oei sa gơh hgăt hloh, kăl năm hơrih sa hloh.