Tơ̆ jơ pơma dơnuh, Kơdră chĕp pơgơ̆r Teh đak Lương Cường sơkơ̆t hơdăh, Việt Nam lăng kơjăp atŏk tơ iung tơgoăt tơgoăl ‘lơ̆ng hơ iă joăt joe đơ̆ng sơ̆ păng jang hơdoi lơ tơdrong hăm Ai Cập păng hơmŏ hơnhăk tơgoăt tơgoăl jang hơdoi ƀar păh tŏk kơtang hloh dơ̆ng, kơjăp hloh dơ̆ng, tơpă hloh dơ̆ng păng jơnei hloh dơ̆ng. Hôn bơnê kơtang rim tơdrong rơvơn jang hơdoi hăm Ai Cập păng châu Phi, Kơdră chĕp pơgơ̆r Teh đak Lương Cường athei atok kơtang ăn khul kơdră kơpal păng rim kơdră năm ngôi dih băl, tơ iung pơjing rim trong jang ‘nao, pơjing rơvơn ăn jang hơdoi dih băl lơ̆m rim tơdrong jang. Kơdră chĕp pơgơ̆r teh đak athei ƀar păh tŏk kơtang iung jang hơdoi, pơchoh trong păng tơgŭm djru dih băl lơ̆m rim ‘măng hop akŏm apŭng plĕnh teh păng lơ̆m tơring, tŏk kơtang tơbăt dih băl tơdrong jang hơ iă, hơgei lơ̆m vei lăng rơngei hiôk hian, kơdranh xek tơlang ‘lơ̆ng vă tơgop kơtang lơ̆m tơdrong rơngei hiôk hian păng sơđơ̆ng kơ tơ̆ tơring păng lơ̆m apŭng plĕnh teh.