Sơng iŏk nơ̆r krao hơvơn đơ̆ng Kơdră Jơnŭm Nghị viện apŭng plenh teh (IPU) Tulia Ackson păng Tổng thư ký Jơnŭm Nghị viện apŭng plenh teh Martin Chungong, Kơdră Quốc hội teh đak Armenia Alen Simonyan, Kơdră Quốc hội Trần Thanh Mẫn tang măt ăn Kơdră chĕp kơ̆l Đảng, Teh đak Việt Nam păng hơkăn ƀok vang truh Hop akŏm Khul kơdră chĕp kơ̆l pơgơ̆r ‘măng mă 150 kơ Jơnŭm Nghị viện apŭng plenh teh (IPU-150), năm ngôi tơ̆ teh đak Cộng hòa Armenia đơ̆ng ‘năr 2-5/4/2025.

Tơdrong Kơdră Quốc hội Trần Thanh Mẫn vang truh Hop akŏm Khul kơdră chĕp kơ̆l Jơnŭm Nghị viện apŭng plenh teh ‘măng mă 150 ‘nŏh jĭ 1 tơdrong tôch gĭt kăl, ăn ƀôh bưng ai ‘nao păng nơ̆r pơkăp tôch kơjăp đơ̆ng Việt Nam tơ̆ Hop akŏm Nghị viện lơ pang tôch gĭt kăl âu, ƀât mă apŭng plenh teh hrei ‘nâu oei  athei rim teh đak vang truh pơma nuh, roi tơbăt ăn băl rim tơdrong kăl, tơlĕch lơ tơdrong pơchĕh rơgei vă sek tơlang dôm tơdrong nol atŭm.

Hăm tơdrong pơvei 2 pang, ‘măng năm ngôi tơ̆ teh đak Cộng hòa Armenia đơ̆ng Kơdră Quốc hội Trần Thanh Mẫn jĭ ‘măng mă blŭng bơngai chĕp kơ̆l Anih chih pơjing luơ̆t kơ teh đak Việt Nam, kŭm jing ‘măng năm ngôi tih hlŏh đơ̆ng kơdră chĕp kơ̆l teh đak Việt Nam iŏk đơ̆ng 2 teh đak pơjing tơdrong pơvei jang tơbôl. Găh tơdrong jang chinh trĭ - tơbôl, Armenia năng Việt Nam jĭ teh đak jang hơdoi gĭt kăl tơ̆ tơring Đông Nam Á. 2 teh đak vei kơjăp tơdrong pơgơ̆r ăn khul grŭp tơbâp, pơma nuh hăm băl, lơ̆m noh đei hloi khul kơdră chĕp kơ̆l.