Tơ̆ Anih oei gĭt kăl kơ ƀok pơtao, tơ̆ loĕl kông Nghĩa Lĩnh gĭt kăl, hăm jơhngơ̆m đon kŭp yom ƀlŏk hơdơ̆r kŏng jang đơ̆ng ƀok yă tơm dơnơm sơ̆, tơƀôh jơhngơ̆m đon “Nhă đak ƀlŏk hơtu” đơ̆ng hơdrĕch hơdrŭng Việt Nam, Kơdră teh đak Lương Cường kŭm hăm đe kră kơdră chĕp kơ̆l Đảng, Teh đak, Khŭl kơdră teh đak păng kơdră chĕp kơ̆l tơring mơ̆t tơ̆ Hơnih oei kơ ƀok pơtao soh nhang, dan pơkao tơƀôh jơhngơ̆m băt bơnê gĭt kăl kơ đe ƀok yă tơm dơnơm sơ̆ hlôi đei kŏng pơjing teh đak vă kon pơlei chĕp vei dơ̆ng tơdrong joăt joe Lạc Hồng pơjing teh đak Việt Nam pơdrŏng ‘lơ̆ng, hơgei nhen hrei ‘nâu.

Prăt khei sơnăm pơjing teh đak păng vei teh đak, jơhngơ̆m đon băt blŏk hơdơ̆r kơ kŏng jang đơ̆ng ƀok yă tơm dơnơm sơ̆ hlôi jing tơ ley tơgoăt hơdai, hơnih gơnang jơhngơ̆m đon, jơhngơ̆m pran gĭt kăl đơ̆ng hơdrĕch hơdrŭng, pơm jing tơdrong hơiă chĕp hơnăn Việt Nam lơ̆m tơgoăt pôm nơ̆r ƀơ̆r đon tơ jră jĭ jăn, sar bar, vei lăng păng pơjing teh đak ‘lơ̆ng rŏ. Soi kơ ƀok pơtao tơm dơnơm Hùng Vương ưh khan lăp jing năr lêh tih kơ drĕch hơdrŭng, mă oei jing năr vă păr ang jơhngơ̆m đon ‘mêm kơ teh đak, đon hơdrin kơdih păng hơpơi ‘meh yak tŏk - ƀlep nhen nơ̆r Ƀok Hồ hlôi tơtă: “Đe ƀok pơtao Hùng hlôi đei kŏng pơjing teh đak, Ƀok sâu bơ̆n athei vang hơdai băl vei iŏk teh đak”.