Đơ̆ng rŏng 1 khei bơ̆ jang kiơ̆ trong bơ̆ jang khul kơdră chĕp pơgơ̆r 2 kâp, dêh char Lâm Đồng dơ̆ng mă 4 lơ̆m teh đak găh tơdrong lăp đon bơ̆ jang ‘lơ̆ng. Mă lei, lơ̆m khei ‘năr bơ̆ jang jei đei ƀôh mĭnh ƀar tơdrong tơnap tap, tơhlăk tơhlĭn tơ̆ tơring. Mă hơdăh ‘noh tơdrong ưh kơ măh khul bơ̆ jang gơh hơgei vă xek tơlang dôm tơdrong bơ̆ jang. Lơ̆m dêh char đei 93 tơring, phương ưh kơ đei kang ƀô̆ bơ̆ jang tơm găh kmăi kmŏk kơtơ̆ng ang; 60 tơring, phương ưh kơ măh bơngai bơ̆ jang lơ̆m vei lăng cham char; 33 tơring, phương ưh kơ tôm bơngai bơ̆ jang lơ̆m tơdrong jang vei lăng năng tông tơ iung pơjing ming man... Đơ̆ng năr 1/8, Hơnih vei lăng kon pơlei dêh char Lâm Đồng hlôi ăn kang ƀô̆, bơngai jang năm bơ̆ jang tơ̆ rim tơring. Lơ̆m ‘măng mă ou đei 260 ‘nu kang ƀô̆ đei ăn năm bơ̆ jang tơ̆ tơring. Atŭm hăm ‘noh, Kŏng ang dêh char Lâm Đồng ăn 370 ‘nu kang ƀô̆ kŏng ang păng Khul Ƀô̆ đô̆i ăn 100 ‘nu ƀô̆ đô̆i năm bơ̆ jang tơ̆ tơring. Tơchĕng hơlou rim kang ƀô̆ gô năm jang tơ̆ tơring iung jang lơ̆m 3 khei, iung jang hloi lơ̆m dôm tơdrong jang đei pơjao; adoi pơtho tơbăt,pơtho pơjing ăn kang ƀô̆ tơring.