Pơma ah jơ lêh, Tổng Bí thư Tô Lâm sơkơ̆t hơdah, hăm kơchư̆k jang Tổng Bí thư kơ Đảng, ƀok Nguyễn Văn Linh hlôi pơtơm dôm tơchơ̆t tơplih jang pran kơtang, pơklaih dôm tơdrong tơhlăk tăk gah tơchơ̆t jang, akŏm jơhngơ̆m pran vă pơm jang, pơih să hiôk hian tơ̆ tơring, jang hơdrol păng đơ̆ng rŏng kơ noh hơmet dôm hơnih jang mŭk drăm 'nguaih kơ teh đak vei lăng, pơjing tơdrong jang tĕch răt hăm tơdrong vei hơlen đơ̆ng teh đak, pơih să tơdrong jang tơbôl, jang hơdoi lơ̆m apŭng plenh teh.

Ră hơdah, lơ̆m khei năr tôm kon pơlei oei akŏm jơhngơ̆m pơm jang đei jơnei Tơchơ̆t Hop akŏm mă 13 kơ Đảng, jơ̆p teh đak pơtơm jang kiơ̆ pơkăp hơnih jang hanh chinh 2 tăl hăm tơdrong hơtŏk tơ-iung 'nao, Tổng Bí thư Tô Lâm pơtruh nơ̆r hơpơi 'meh, tôm hơnih jang chinh trĭ athei tơ-iung nhen đon bơnôh  trong jang Nguyễn Văn Linh – tơplih 'nao đon tơchĕng, pơm jang tơguăt hăm kon pơlei păng tơpăt jue kiơ̆ pơkăp hơtŏk mŭk drăm pơm jang xah hô̆i chu nghĩa, mă lei atŭm hăm noh athei hơbĕch pơtrŏ hăm dôm tơchơ̆t jang 'nao jơk rơgoh 'lơ̆ng, tơplih kơmăi kơsô̆, mŭk drăm kơsô̆; pơtoi 'nhăk teh đak bơ̆n jang hơdoi pơih să hloh lơ̆m apŭng plenh teh, hăm dôm teh đak pran hơgei, vă dah kiơ̆ tôm nhen rim teh đak nai lơ̆m jơ̆p plei teh.